1 май куни Ўзбекистон президенти Шавкат Мирзиёев Тошкент вилоятининг Қибрай туманида янги боғ барпо этилаётган ҳудудга ташриф буюриб, илк дарахтларни ўтқазишда иштирок этди. Давлат раҳбари янги боғ ҳудуди Тошкент таркибига ўтказилишини маълум қилди.
«Бу боғ Тошкент вилояти ҳудудида жойлашган. Бу ерларни Тошкент шаҳарга ўтказиб берамиз. Парламент тасдиқласа, бу [ер] Тошкентга ўтади. Барибир, Тошкент шаҳри катта бўлиши керак. Аҳолимизнинг уй-жойга, ижтимоий соҳаларга талаби юқори бўлаяпти», — деди давлат раҳбари (иқтибос «Ўзбекистон 24» телеканали лавҳасидан олинди).
Президентнинг сўзларига кўра, уч-тўрт йил ичида Тошкентда қурилиш соҳасида катта ишлар амалга оширилди, янги бино ва объектлар бунёд этилди.
«Энди буни тўхтатиб, [қурилиш ишларини] шаҳардан ташқарига чиқариш керак», — деди президент.
Эслатиб ўтамиз, февралда «Тошкент-Шарқий» аэродроми яқинида 155 гектарлик дендропарк, 160 гектарлик Олимпия шаҳарчаси ва Чирчиқ дарёси қирғоқларида 270 гектарлик парк барпо этилиши ҳақида хабар қилинган эди.
Фото: «Ўзбекистон 24».
Президент янги боғда дарахтларни улкан дарахтнинг бешта новдаси шаклида экишни таклиф қилди, бу Ўзбекистонни ривожлантириш бўйича Ҳаракатлар стратегиясининг бешта устувор йўналишини рамзий маънода англатади.
Худди шу ерда мамлакат мустақиллигининг 30 йиллигига бағишланган «Истиқлол» мажмуаси ҳам бунёд этилади. Қурилиш вазирлигининг «Газета.uz»га аниқлик киритишича, гап Тошкент марказидаги Мовий гумбазлар хиёбонида жойлаштирилиши режалаштирилган мажмуа ҳақида кетмоқда.
Фото: Президент матбуот хизмати.
Шавкат Мирзиёев ушбу боғ «Ўзбекистоннинг янги қиёфасини, унинг улкан салоҳиятини, кўп миллатли халқимизнинг бирлиги ва ҳамжиҳатлигини акс эттирувчи» мажмуа бўлиши кераклигини таъкидлади. Шуларни инобатга олган ҳолда у боққа «Янги Ўзбекистон» номини беришни таклиф қилди. Йиғилганлар таклифни маъқуллашди.
