БМТнинг Ўзбекистондаги доимий координатори Хелена Фрэйзер 28 март куни Тошкент марказида содир бўлган тартибсизликларга муносабат билдирди.
«Бутун дунёда бўлгани каби, Ўзбекистонда ҳам БМТ ҳар қандай шахсга нисбатан камситиш ва зўравонликнинг ҳар қандай кўринишини қоралайди. БМТ, шунингдек, тўғридан-тўғри толерантлик, инклюзивлик, ижтимоий хилма-хиллик ва инсон ҳуқуқларининг умумбашарий меъёрлари ва тамойилларининг бўлган нафрат ва адоват ифодаларининг ишлатилишини ҳам қоралайди», — дейилади баёнотда.
«БМТнинг Ўзбекистондаги жамоаси Ўзбекистон ҳуқуқни муҳофаза қилиш идораларини ҳафта охирида содир бўлган хавотирли воқеалар юзасидан холис текширув ўтказишга чақиради», — дейди Хелена Фрэйзер.
«Шунингдек, биз оммавий ахборот воситалари, блогерлар ва фуқаролик жамиятини нафрат ва дискриминациянинг ҳар қандай кўриниши натижаси бўлган зўравонликка қарши курашга биргаликда ишлашга чақирамиз», — дея қўшимча қилади у.
БМТнинг Ўзбекистондаги доимий координатори ташкилотнинг бош котиби Антониу Гутерришнинг сўзларини келтирди. У БМТ низомига таяниб, шундай деган эди: «Инсон ҳуқуқлари ҳар бир инсоннинг туғилиши билан бериладиган ҳуқуқлардир ва бу ҳар бир мамлакат манфаатида. Улар барқарорликни таъминлайди, бирдамликни мустаҳкамлайди ҳамда тараққиётга ёрдам беради».
Бундан ташқари, содир бўлган воқеага айрим хорижий мамлакатларнинг элчилари Twitter орқали муносабат билдирган.
AҚШ элчиси Дэниэл Розенблюм қуйидагича ёзган эди: «Дам олиш кунлари Тошкент кўчаларида зўравонликни кўриш жуда хавотирли. Ўзбекистон ҳукуматини блогер Миразиз Бозоровнинг калтакланиши бўйича суриштирув ўтказишга чақираман».
Буюк Британия элчиси Тим Торлот шундай деди: «Дам олиш кунлари ўтказилган намойишларда шунча нафратни кузатиш жуда ачинарли. Биламан, бу жуда нозик масала. Бироқ, хилма-хил жамият — бу кучли жамият. Толерантлик. Блогер/журналистларга зўравонлик қилишни оқлаб бўлмайди».
