28 март куни тахминан 15:00да Тошкент марказида ЛГБТ фаолларига қарши намойиш бўлиб ўтди. Ҳодиса акс этган видеоёзувлар ижтимоий тармоқларда эълон қилинди. Уларда бир неча ўнлаб эркакларнинг Форумлар саройи қаршисида йўлнинг ҳаракат қисмида юргани ва «Аллоҳу акбар!» деб такбир айтгани акс этган.
Кечқурун пойтахт ИИББ 12 кишининг қўлга олингани ҳамда ҳолат юзасидан Миробод тумани ИИО ФМБ Тергов бўлими томонидан Жиноят кодексининг 277-моддаси 2-қисми («Безорилик») аломатлари билан жиноят иши қўзғатилганини хабар қилди.
ИИББ хабарига кўра, 3−4 нафар фуқаролар Т.С. исмли йигит ва Б.Р. исмли қизни ЛГБТ фаоллари деб гумонлаб, уларни уришга ҳаракат қилган.
«Ушбу фуқароларга 20−25 нафар бошқа шахслар қўшилиб, жамиятда юриш-туриш қоидаларини қасддан менсимасдан, безорилик ҳаракатларини содир этишган», — дейилади хабарда. Видеолавҳада одамлар кўпроқ бўлганини кўриш мумкин.
Ҳудудда хизмат қилаётган ИИББ ва Миллий гвардия ходимлари аралашиб, икки ёшнинг танасига шикаст етказмасликлари учун химоя қилишди, таъкидланди хабарда. Бироқ, кейинчалик бир гуруҳ эркаклар йигитни калтаклагани ва қиз ҳам зарар кўргани маълум бўлди.
Қайд этилишича, мазкур жанжалда диний мазмундаги низо бўлмаган.
Алишер Қодировнинг муносабати
Ҳодисадан бир неча соат ўтиб «Миллий тикланиш» партияси етакчиси ва Қонунчилик палатаси спикер ўринбосари Алишер Қодиров Telegram-каналида Жиноят кодексининг 120-моддасини («Бесоқолбозлик») янада кучайтириш зарурлигини маълум қилди.
«Тошкентда бесоқолбозларнинг рухсат берилмаган провакацион митинги ўтказилибди. 70 га яқин митинг иштирокчилари тегишли суриштирувлар учун ушланган. Тартиббузарларга тегишли чора кўрилиши аниқ, лекин масала бошқа томонда… Бу оддийгина тартибни бузиш эмас. Бу миллат қадриятлари ва жамиятнинг фундаментал устунларига майда-майда, лекин йирик ниятлар билан урилаётган зарбадир», — деди депутат.
Унинг таъкидлашича, бу ҳолат Жиноят кодексининг 120-моддасини янада кучайтиришга эҳтиёж борлигини яққол кўрсатди. «Модда бесоқолбозлик, ЛГБТ ғояларини ҳар қандай шаклда тарғиб қилишни таъқиқлаши керак. Албатта, жазо жуда юмшоқ. Бу модда санкциялари мажбурий даволаш, озодликдан маҳрум этиш, мамлакат фуқаролигини бекор қилиш, мамлакатдан бадарға қилишгача кўзда тутиши керак», — деди у.
«Террорчилардек ғурурсизларнинг ҳам миллати бўлмайди! СИЗЛАРНИ РАД ЭТАМИЗ! Ўзбекистон сиздеклар яшай олмайдиган юрт бўлиши учун ҳамма нарсани қиламиз», — дея таъкидлади Алишер Қодиров.
Расул Кушербаевнинг муносабати
Аввалроқ ЎзЛиДеП аъзоси, депутат Расул Кушербаев халқаро ташкилотларнинг ЖКнинг 120-моддасини бекор қилиш тўғрисидаги чақириқларига жавобан бир жинсли муносабатлар қонунийлаштирилган кун «бизнинг ўлганимиз бўлади», — деган эди.
Тошкентда бўлиб ўтган намойишдан сўнг, Расул Кушербаев ҳам муносабатбилдирди.
«Афсуски, Амир Темур ҳиёбонида бўлиб ўтган тартибсизлик сўз эркинлиги чегарасини очиқчасига бузиш ва омма ўртасида ихтилоф чиқариш йўлидаги ҳаракат бўлди. Балки айрим яширин кучларнинг мақсадига етиш учун айни муддао бўлган бўлиши ҳам мумкин», — деб ёзади Расул Кушербаев.
«Сўз эркинлиги шуки, бунда сиз эшитишни истамаган шахсларнинг фикрига қўшилмасангиз ҳам унга тоқат қилиш ва позициянгизни ғоялар бахсида ҳимоя қилишдан иборат. Ва бу ҳеч қачон шахсиятга ўтиш ёҳуд „провакация“ орқали куч ишлатишга олиб келиши керакмас. Агар бу чегарани бузсангиз, демак сўз эркинлиги сиз учунмас. Айнан шу нуқтада сўз эркинлигининг чегараси тугайди. У ёғи эса қонунан жавобгарликка сабаб бўлувчи тартибсизлик ва ҳақоратга олиб бориши мумкин. Жамият буни қабул қилолмаса, демак сўз эркинлиги тушунчасини англаш ва ундан фойдаланишга маънан ҳақли эмас», — дея таъкидлади депутат.
Расул Кушербаев фикрига кўра, ЛГБТ масаласида жамиятнинг аксари фикр орқали ўз позициясини билдирмоқда.
«Табиятан аёл ва эркак сифатида дунёга келиб, табиий равишда умр кечираётган сайловчилар фикри ҳамда ўзимнинг шахсий қарашларимдан келиб чиқиб мен ҳам бунга ўз муносабатимни билдирдим: ЛГБТ масаласига қаршиман», — деди у.
Депутат таъкидлашича, мазкур ҳаракатларда бунга нисбатан куч ишлатиш ёҳуд тартибсизлик қилишга чақирилмаган.
«Биз ўзимизга ёқмаса ҳам уни мустақил фикр сифатида тоқат қилиб тинглашга бурчлимиз», — деб айтди у.
Депутат сўзларига кўра, эшитишни истамаган фикр ва қарашлар, муаммоли масалалар ҳеч қачон куч ишлатиш ва тартибсизлик қилиш йўли билан ҳал қилинмайди.
«Бўлиб ўтган тартибсизликни жамиятнинг онгли аъзоси сифатида ҳеч қачон оқлай олмайман. Ва барчани „оломон жамият“ қиёфасини кўрсатмай, муаммоларни босиқлик билан „диалог“ орқали ҳал этадиган маданиятли мамлакат фуқаролари сифатида намоён қилишга чақириб қоламан. Биз асли бундай эмасмизку!», — таъкидлади у.
«Тартибсизлик, «оломонлик» ва «провакация»га йўл қўймайлик! Тартиббузар ва бунга чорловчи «провакатор"ларга эса қонуний чора кўрилишини сўраб қоламиз», — дея кўшимча қилди депутат.
