27 январь куни Тошкент вилояти Қибрай тумандаги профилактика инспекторлари ўз ҳудудларидаги муқаддам жиноий жавобгарликка тортилгани учун ИИБ рўйхатида турувчи, шунингдек, бекор юрган йигитларни эрталабки соат 6:00да Қибрай туман ИИБга «йиғилиш бўлади» деб, олиб кетган.
Kun.uz нашрининг хабар қилишича, йигитлар автобусда Чирчиқдаги ҳарбий дала полигонга олиб борилган ва уларга 10 кун давомида ҳарбийча ҳаёт кечиришлари айтилган. Фарзандлари қаерга олиб кетилганидан бехабар кўпчилик ота-оналар ва уларнинг яқинлари ҳарбий полигонга келиб, олиб келинган йигитларни қайтариб олиб кетиш учун рухсат сўрашган. Лекин масъуллар фақат маҳалла инспекторларининг рухсати билангина йигитлар қўйиб юборилишини маълум қилишган.
Олиб кетилган йигитлар яқинлари Kun.uz'га участка нозирлари уларни туман ИББга олиб кетиш чоғида ҳарбий полигонга бориш ва у ерда 10 кун яшашга тўғри келиши ҳақида ҳеч қандай маълумот бермаганини айтган.
Тошкент вилояти ИИББ ахборот хизмати бошлиғи Бобур Тўлагановнинг таъкидлашича, бу иш фақатгина қибрайликлар билан содир бўлмаган.
«Муқаддам судланган, тузалиш йўлига ўтмаган, Тошкент вилояти ички ишлар органларининг рўйхатида турувчи 200 нафар уюшмаган ёшлар Хавфсизлик кенгашининг қарорига асосан Чирчиқдаги ҳарбий полигонга олиб келинган. Улар бу ерда 10 кунлик дастур асосида маънавий-маърифий дарслар, ҳуқуқ соатлари, ҳарбий ва касбий тайёргарлик машқларида қатнашади.
Йигитлар 3 маҳал иссиқ овқат ва турар жой билан таъминланади. Машғулотлардан сўнг, уларга меҳнат биржаси орқали муносиб иш топиб бериш мақсад қилинган, ушбу машғулотлар ихтиёрий бўлиб, ҳарбий полигонга олиб келинганларнинг деярли барчаси бу ердаги ҳолатдан рози. Баъзи муқаддам судланган йигитлар ҳали ҳам тузалиш йўлига ўтмагани, ёмон хулқидан шикоят қилингани учун ота-онасининг илтимоси билан келтирилди" — дейди вилоят ИИББ масъул ходими.
