Италия бош вазири истеъфога чиқди
Италия бош вазири Жузеппе Конте истеъфога чиқди. Аввалроқ, яъни 25 январь куни Конте Вазирлар Кенгашининг мажлисини ўтказиб, унда у ўз нияти ҳақида эълон қилди. Бунга собиқ бош вазир Маттео Ренцининг «Барҳаёт Италия» партияси Сенат таркибидан чиқиб кетгани, бу эса «5та Юлдуз Ҳаракати» ва Демократик партиянинг таркибидаги ҳукмрон коалициянинг парламентда кўп ўринларни йўқотгани сабаб бўлди. Президент 27 январь куни ҳукумат инқирозидан чиқиш бўйича сиёсий маслаҳатлашувлар бошланганини маълум қилди. Таъкидланишича, ҳукуматнинг истеъфога чиқиши билан парламентнинг тарқатилиши ва янги сайловлар тайинланиши кутилмаяпти. — Газета.uz
Трамп Флоридада AҚШ собиқ президенти идорасини очди
Дональд Трамп Флорида штатида (Палм-Бич округи) AҚШ собиқ президенти сифатида фаолиятини бошқарадиган идора очди. Собиқ президент офиси Трампга йўлланган ёзишмаларни саралаш, шунингдек, унинг жамоатчилик олдида чиқишларини ва баёнотлар тайёрлашни ташкил этиш вазифасини ўз зиммасига олади. Бундан ташқари, ташкилот тарғибот ва жамоатчилик фаоллиги орқали AҚШ манфаатлари йўлида Трамп маъмуриятининг кун тартибини илгари суради. 24 январь куни собиқ президентнинг сайловолди кампанияси бўйича маслаҳатчиси Жейсон Миллер Трамп янги сиёсий партия яратиш режаларидан воз кечганини маълум қилди. — Reuters.
Тунисда бир ҳафта давом этган тартибсизликларда 1,2 мингдан ортиқ одам ҳибсга олинган
Сўнгги бир ҳафта ичида Тунис ҳуқуқни муҳофаза қилиш идоралари республиканинг турли минтақаларида содир бўлган тартибсизлик қатнашган 1,2 мингдан ортиқ кишини ҳибсга олишди. «Сўнгги тунги тартибсизликлар билан боғлиқ равишда ҳибсга олинганларнинг сони 1200 кишидан ошди, шулардан 30 фоизи вояга етмаганлардир», — дея маълум қилди Тунис Инсон Ҳуқуқлари Лигаси раиси Бассем Трифи. Унинг сўзларига кўра, ҳибсга олинган одамларнинг аксарияти тинч намойишларда қатнашган, ҳукумат қароқчилик ва бузғунчиликда бевосита иштирок этганларнинг бир нечтасини ҳибсга олишга муваффақ бўлган. Тартибсизликлар 16 январь куни кечқурун Туниснинг пойтахт ва бир неча вилоятида бошланди. Намойишчилар иқтисодий инқироз ва юқори даражадаги ишсизлик сабабли ҳукуматнинг истеъфосини талаб қилган. Маълумотларга кўра, улар тўсиқлар ўрнатишган, машиналарнинг шиналарини ёқишган, бузғунчилик ва талон-торож қилишган. — ТАСС.
АҚШ тарихида илк бор аёл киши молия вазири этиб тайинланди
AҚШ Сенати Жанет Йелленни (74 ёш) мамлакат молия вазири этиб тасдиқлади. Шундай қилиб, AҚШ тарихида илк бор вазирликни аёл киши бошқаради. Йеллен таниқли иқтисодчи, илгари AҚШ Федерал резерв тизимини бошқарган. Янги вазир санкциялар режимини стратегик ҳолатга келтирган ҳолда қайта кўриб чиқмоқчи эканлигини эълон қилди. Шу билан бирга, у Россияга қарши Қрим бўйича санкцияларни сақлаб қолмоқчи. Шунингдек, у иқтисодий қўллаб-қувватлашнинг иккинчи тўплами устида ишламоқчи. Йеллен узоқ муддатли бюджет тенденциялари хавотирли ҳолатда эканлигини, аммо пандемия билан курашиш ва иқтисодиётни ривожлантириш учун узоқ муддатли сармоялар киритиш муҳимлигини таъкидлади. — АҚШ Сенати.
Ҳиндистон TikTok ва бошқа 58та Хитой иловасини доимийга блоклади
Ҳиндистон ҳукумати миллий суверенитетга таҳдид солаётган машҳур TikTok ижтимоий тармоғини ва бошқа 58та Хитой иловасини доимийга блоклади. Мамлакат Aхборот технологиялари вазирлиги хитойлик ишлаб чиқувчиларнинг хизматлари хавфсизлиги билан боғлиқ жавоблари ва тушунтиришларидан қониқмаганлиги таъкидлади. Ҳиндистон ҳукумати 2020 йил июнь ойида 59та Хитой дастурини вақтинча блоклашга қарор қилган эди. Расмийлар ушбу иловаларнинг фаолияти «Ҳиндистон суверенитети ва яхлитлигига» зарар етказиши, шунингдек, мамлакат хавфсизлиги ва жамоат тартибига таҳдид солиши билан изоҳладилар. — The Economic Times.
Флорида бу йил Токио ўрнига Олимпиадани ўтказишни таклиф қилди
АҚШнинг Флорида штати молия бўлими раҳбари Жимми Патронис Халқаро Олимпия Қўмитасини (ХОҚ) Ёзги Олимпия ўйинларини Япониядан AҚШга ўтказиш имкониятини кўриб чиқишга таклиф қилди. «Сизга 2021 йилги Олимпиадани Япониянинг Токио шаҳридан AҚШга, аниқроғи, Флорида штатига кўчириш имкониятини кўриб чиқишга сўрайман», — дейилади Патронис ХОҚ раҳбари Томас Бахга юборган хатида. Унинг сўзларига кўра, баъзи ОАВлар Япония ҳукумати Олимпия ўйинларини ўтказишда жиддий хавотирдалигини ёзмоқда. Патрониснинг таъкидлашича, Флорида бундай йирик тадбирни ўтказиш учун зарур имкониятларга эга, хусусан, ҳудудда ривожланган транспорт тизими ва спорт иншоотлари мавжуд. — Интерфакс.
