2021 йил — Ёшларни қўллаб-қувватлаш ва аҳоли саломатлигини мустаҳкамлаш йилида амалга оширишга оид давлат дастури фармони лойиҳаси жамоатчилик муҳокамаси учун эълон қилинди.
Фармон лойиҳаси билан жамоатчиликнинг ЙҲХХнинг асосий фаолиятини «фуқароларга кўмак бериш»га йўналтириш ҳамда коррупцияга имкон берадиган омилларни бартараф этиш чораларини кўришга доир таклифлари маъқулланмоқда.
Шунга мувофиқ, янги автомобилни техник кўрикдан ўтказиш талаби бекор қилиниши ҳамда транспорт воситасини техник кўрикдан ўтказиш экстерриториаллик принципи асосида йўлга қўйилиши мумкин.
Тошкент, Нукус шаҳарлари ва вилоятлар марказларида биттадан рўйхатдан ўтказиш ва имтиҳон олиш бўлимларида «прописка»дан қатъи назар транспорт воситаларини давлат рўйхатидан ўтказиш ва уларга давлат рақамини бериш кўзда тутилмоқда.
Яна бир таклиф — барча рўйхатдан ўтказиш ва имтиҳон олиш бўлимларида ҳамда 20 та ДХМларда миллий ҳайдовчилик гувоҳномасини расмийлаштириш экстерриториаллик принципи асосида амалга оширилади. Ҳайдовчилик гувоҳномаси учун имтиҳон жараёнини онлайн кузатиш имконини яратиш ҳам режа қилинган.
276 та банддан иборат лойиҳа муҳокамаси «Тараққиёт стратегияси маркази» ҳамда «Юксалиш» УМҲнинг махсус сайтларига жойлаштирилган.
Муҳокамалар 27 январь куни якунланади.
