Хитой «Чанчжэн-5» элтувчи ракетаси орқали автоматик тарзда Ерга қайтадиган тупроқ йиғувчи аппаратини муваффақиятли тарзда космосга учирди, дея хабар берди ТАСС. Хитой Ойдан тупроқ олиб келиш миссиясини юборган учинчи мамлакатга айланди. Бунгача фақат АҚШ ва Собиқ Иттифоқ ушбу вазифани бажаришган.
«Чанъэ-5» деб номланувчи ўзи қайтадиган ускуна режа бўйича уч ҳафтадан сўнг Ерга Ой тупроғини олиб келиши керак. Бунда ускуна 8 кундан сўнг Ойга қўнади ва кавлаш ишларини бошлайди. Олиб келиниши режалаштирилган тупроқ ҳажми 2 кгга тенг. Тупроқ илмий ўрганиш ва тадқиқот қилиш мақсадида олиб келинади.
«Чанчжэн-5» (CZ-5) ракетаси маҳаллий вақт билан соат 4:30 да учирилди. Агар топшириқ муваффақиятли амалга оширилса, Хитой сўнгги 44 йил ичида Ой сатҳидан геологик намуналарни ташиш лойиҳасини амалга оширган биринчи мамлакат бўлади.
«Чанъэ-5» аппарати оғирлиги 8,2 тоннани ташкил этади ва ойга қўниш, унинг юзасидан учиш, орбитада намуналар жойлаштирилган контейнерларни жойлаштириш ва қайта юклаш, шунингдек, Ерга қайтиш учун мўлжалланган тўртта модулдан иборат. Миссия дастлаб 2017 йилга режалаштирилган эди, кейин у 2019 йил охирига, кейин эса ноябрга қолдирилди.
