Европа Иттифоқи Алексей Навалний билан юзага келган вазият сабабли олти нафар россиялик амалдорга ва битта илмий институтга қарши санкциялар эълон қилди. Рўйхат Европа Иттифоқи Кенгаши журналида эълон қилинди. Кейинчалик худди шундай санкцияларни Буюк Британия ҳам жорий қилди.
Руйхатга қўйидаги шахслар киритилган:
- Россия Федерал хавфсизлик хизмати директори Александр Бортников;
- Президент маъмурияти раҳбарининг биринчи ўринбосари Сергей Кириенко;
- Ички ишлар бўйича президент бошқармаси раҳбари Андрей Ярин;
- Президентнинг Сибирдаги масъул вакили Сергей Меняйло;
- Мудофаа вазири ўринбосарлари Павел Попов ва Алексей Криворучко.
Чекловлар, шунингдек, «Новичок»ни яратишда иштирок этган Давлат органик кимё ва технология илмий-тадқиқот институтига нисбатан ҳам қўлланилади.
РИА Новости хабарига кўра, санкциялар Европа банкларидаги активларни музлатиш ва Европа Иттифоқи ҳудудига киришни тақиқлашни назарда тутади. Россия ҳукумати бунга жавобан қарама-қарши санкциялар ҳам мос равишда бўлишини маълум қилди.
Алексей Навальний август ойида самолётда парвоз пайтида аҳволи оғирлашиб, заҳарланишда гумон қилинган ва касалхонага ётқизилган эди. Икки кундан кейин у Берлинга кўчирилган. Сентябрь ойида Германия ҳукумати Алексей Навальнийни «Новичок"ка ўхшаш заҳар тури билан заҳарланганлигини эълон қилди.
