Бу йил кимё бўйича Нобель мукофотини CRISPR/Cas9 геномларни таҳрирлаш услубини яратгани учун Женнифер Дудна ва Эмануэль Шарпеньтьега берилди, дея хабар берди РИА Новости.
Ҳозирда Германияда фаолият олиб бораётган француз микробиологи Шарпантье ва унинг америкалик ҳамкасби биохимик Женнифер Дудна (Калифорниядаги Беркли университети, АҚШ) бир неча йил аввал бактерияларда вируслардан сақланиш учун молекуляр «иммунитет» мавжуд эканлигини кашф қилишди. Бу кашфиётни эса турли хил организмалардаги геномларни ўта аниқлик билан таҳрирлашда қўллашга муваффақ бўлинди. Ҳозирги кунда бутун дунё олимлари оғир касалликлар, шу жумладан, ОИТС ва турли хил ирсий хасталикларни даволашда бирор ёндашув ишлаб чиқишда «геномни таҳрирлаш» усулидан фойдаланишади.
Эслатиб ўтамиз, 5 ва 6 октябрь кунлари Нобель қўмитаси физиология ва тиббиёт, шунингдек, физика соҳаси бўйича лауреатларни эълон қилган эди. 8 октябрь куни адабиёт бўйича мукофотни ким қўлга киритгани, 9 октябрда эса Тинчлик мукофоти лауреатлари номи маълум бўлади. Ҳафта сўнгида, 12 октябрь куни Швеция давлат банки томонидан 1969 йили таъсис этилган иқтисодиёт бўйича Алфред Нобель ёдгорлик мукофоти кимга аталгани эълон қилинади.
Бу йил ҳар бир Нобель мукофотининг миқдори 10 млн швед кронасига (1,1 млн АҚШ доллари) тенг.
