Der Spiegel Алексей Навальнийнинг ўзига келгани ҳақида хабар берди. The Insider нашри эса Навальний хушидан кетишдан олдинги воқеаларни эслай олаётгани ҳақида ёзди. Иккала нашрнинг ҳам хабар беришича, маълумотлар Bellingcat нашри билан биргаликда тайёрланган. Бироқ Bellingcat бу ҳақда хабар чиқармади.
Эслатиб ўтамиз, 20 август куни Алексей Навальнийнинг оғир аҳволда Омск шошилинч касалхонасининг жонлантириш бўлимига ётқизилгани ҳақида хабар берилган эди. Шундан сўнг, 22 август куни кома ҳолатида бўлган сиёсатчи Берлиндаги «Шарите» клиникасига олиб келинган. Клиника мутахассислари сиёсатчининг заҳарланган бўлиши мумкинлиги ҳақида айтишди. Бу хабардан сўнг, Reuters ушбу хабарлар тасдиқланса, Германия Россия ҳукуматига нисбатан чекловлар эълон қилиши мумкинлиги ҳақида маълум қилди.
Кейинчалик эса Алексей Навальнийнинг «Новичок» деб номланувчи модда билан заҳарланганлиги ҳақида хабар берилди.
3 сентябрь куни Беларусь президенти Александр Лукашенко Россия бош вазири Михаил Мишустин билан учрашувда Беларусь разведкаси Берлин ва Варшава ўртасида бўлиб ўтган телефон суҳбатини ёзиб олгани ва унга кўра заҳарланиш ҳақидаги маълумотлар сохталаштирилганини айтди. ФРГ ҳукумати вакили Лукашенконинг сўзларини «албатта, нотўғри», деди. Кейинроқ, Беларусь давлат ОАВлари ушбу ёзиб олинган суҳбатни тармоққа жойлаб, оммага маълум қилди.
Москва Навалнийнинг заҳарланиши билан боғлиқ бўлган воқеаларга ҳеч қандай алоқаси йўқлигини маълум қилди. Шунингдек, Омск касалхонаси шифокори, токсиколог Александр Сабаев унинг заҳарланганлиги ҳақидаги хабарларни шубҳа остига қўйди. Унинг сўзларига кўра, сиёсатчининг буйраги, жигари ва ўпкаси зарар кўрмаган, бу унинг танасида токсинлар йўқлигини исботлайди.
Германия канцлери Навальнийнинг суиқасд жабрланувчиси бўлганлигини ва «Россия ҳукумати жиддий саволларга жавоб бериши кераклигини» айтди.
Die Zeit нашрининг ёзишича, россиялик сиёсатчи «Новичок»нинг янги тури билан заҳарланган ва бу аввал маълум бўлган заҳарга қараганда анча хавфлироқ. Нашрнинг таъкидлашича, агар самолётдаги ходимлар тезкор ёрдам кўрсатмаганида ва учувчи Омск шаҳрига тезкор қўнишни амалга оширмаганида, сиёсатчи парвознинг ўзидаёқ заҳар таъсирида вафот этиши мумкин эди.
Германия ҳукумати Навальний билан боғлиқ вазият бўйича Европа Иттифоқи ва НАТО билан умумий позицияни ишлаб чиқишини айтди. НАТО, Европа Иттифоқи, Буюк Британия, Австрия, Литва ва Украина Навалнийга нима бўлганини текшириш ишларини олиб боришларини сўраб Россия расмийларига мурожаат қилди.
Ўз навбатида, Россия ташқи ишлар вазирлиги Германия Россия сўровига кўра маълумот тақдим этмаётганини маълум қилди. Россия ташқи ишлар вазири Сергей Лавров Германиянинг Навальнийнинг заҳарланиши тўғрисидаги расмий мурожаатларга бир ҳафтадан бери жавоб бермаётганлигини ҳурматсизлик деб атади.
7 сентябрь куни Aлексей Навалнийнинг аҳволи яхшилангани ва унинг аста-секин ЎСВ аппаратидан узилиши ҳақида хабар берилди.
АҚШ давлат котиби Майк Помпео эса ушбу масалага Россия юқори мартабали шахсларининг алоқадор бўлиши мумкинлиги ҳақида айтди. Помпеонинг сўзларига кўра, АҚШ Россияга айбдорларни жазолаши кераклигига ишора қилмоқда. «Биз ҳам жавобгарларни аниқлаш учун қўлимиздан келганича ҳаракат қиламиз», — дея таъкидлади АҚШ давлат котиби.
10 сентябрь куни Der Spiegel ва The Insider Алексей Навальнийнинг бутунлай комадан чиққани ҳақида хабар берди. «Ҳозирда у яна гапира олади, шунингдек, самолётда унга нима бўлганини батафсил эслай олади», — деб ёзди The Insider.
Der Spiegel тарқатган хабарга кўра, сиёсатчининг ўзига келгани ҳақидаги гаплардан кейин Берлин полицияси у ётган шифохона назоратини кучайтирган.
«Газета.uz» воқеалар ривожини кузатишда давом этади.
