Ўзбекистон президенти қарорига биноан Алишер Саъдуллаев янги ташкил этилган Ёшлар ишлари агентлиги директори лавозимига тайинланди, дея хабар берди Адлия вазирлиги.
Таъкидланишича, шу муносабат билан, Алишер Саъдуллаев президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисининг биринчи ўринбосари лавозимидан озод этилди.
Маълумот учун, Алишер Саъдуллаев (1994 й. т.) 2017 йил июлида халқ таълими вазири ўринбосари лавозимига тайинланиб, мамлакатдаги энг ёш вазир ўринбосари бўлган эди. Тошкентдаги Сингапур менежментни ривожлантириш институти битирувчиси. Аввал Result ўқув марказини бошқарган. 2018−2019 йиллар Алишер Саъдуллаев Ёшлар иттифоқи раҳбарининг биринчи ўринбосари ва 2019 йилдан Ёшлар иттифоқи Марказий Кенгаши раиси бўлиб ишлаб келаётганди.
Шунингдек, 2020 йили 17 январь куни Ўзбекистон президенти Шавкат Мирзиёевнинг Олий Мажлис Сенати аъзоларини тайинлаш тўғрисидаги фармонни билан Алишер Саъдуллаев сенатор этиб тайинланганди. Ушбу тайинлов билан у мамлакат тарихидаги энг ёш Сенат аъзосига айланди.
Эслатиб ўтамиз, 30 июнь куни Ўзбекистон президенти фармони билан ёшлар сиёсати соҳасидаги қонун ҳужжатларига риоя этилиши устидан давлат назоратини амалга оширувчи янги орган — Ёшлар ишлари агентлиги ташкил этилганди.
