Соғлиқни сақлаш вазирлиги ахборот хизматининг хабар беришича, Тошкент шаҳридаги Вирусология илмий-текшириш институти клиникасидан 12 нафар, Эпидемиология, микробиология ва юқумли касалликлар илмий-текшириш институти клиникасидан 21 нафар, жами 33 нафар коронавирус инфекциясига чалинган бемор бутунлай соғайди. Фарғона вилоятида сўнгги коронавирус бемори ҳам тузалди.
Барча тузалганлар реабилитация кузатилган.
Вирусология илмий-текшириш институти клиникасида тузалганлардан 5 нафари коронавирус инфекциясига чалинганлар билан мулоқот орқали касалликни юқтириб олган. 3 нафари Тожикистон Республикасидан, 2 нафари Қозоғистон Республикасидан ва яна 2 нафари Россиядан келган ва карантинга олинган.
Эпидемиология, микробиология ва юқумли касалликлар илмий-текшириш институти клиникасида тузалганларнинг 18 нафари хориждан келган, жумладан, 7 нафари Тожикистон Республикасидан, 3 нафари Қозоғистон Республикасидан ва 1 нафари Россиядан, шунингдек, яна 7 нафари Дубай-Тошкент чартер рейси орқали келиб, карантинга олинган. Коронавирус аниқлангач, клиникага ётқизилган. Қолган 3 нафари эса коронавирус инфекциясига чалинганлар билан мулоқот орқали касалликни юқтириб олган.
Тошкентда тузалган барча беморлардан 21 нафари эркак, 12 нафари аёл. Улар орасида энг ёши каттаси 56 бўлса, энг ёши кичиги 2019 йил туғилган чақалоқ. Ҳудудлар кесимида, Тошкент вилоятидан 8 нафар, Намангандан 5 нафар, Самарқанд вилоятидан 4 нафар, Тошкент шаҳридан 10 нафар, Қашқадарё вилоятидан 2 нафар, Бухоро, Сирдарё, Фарғона ва Андижон вилоятидан 1 нафардан.
Тошкент шаҳрида шу пайтга қадар 635 нафар бемор соғайган бўлса, эндиликда улар 668 нафарга етди.
Бундан ташқари, Фарғона вилоятида коронавирусга чалинган сўнгги бемор соғайиб, реабилитацияга кузатилди.
Фарғонада тузалган сўнгги бемор (40 ёшли эркак) ушбу вилоятнинг Олтиариқ туманидан бўлиб, коронавирус инфекциясига чалинган фуқаролар билан мулоқот орқали касалликни юқтириб олган.
Ҳозирда мамлакат бўйлаб коронавирус инфекциясидан бутунлай соғайганлар 2110 нафарни ташкил этмоқда.
