АҚШ президенти Дональд Трамп 22 апрель куни мамлакатга иммиграцияни тўхтатиш тўғрисидаги фармонни имзолади. Чеклов 60 кун муддатга жорий қилинган ва керак бўлганда яна узайтирилиши мумкин, дейилади Оқ уйнинг расмий сайтида.
Трамп мазкур чекловни АҚШ ишчиларини ҳимоя қилиш мақсадида жорий қилганини айтди. Чеклов 60 кун давом этади ва кейин қайта кўриб чиқилиб, эҳтимолан узайтирилиши мумкин. «Иммиграцияни тўхтатиб, биз ишсиз америкаликларга иқтисодиётимиз қайта очилганда ишга жойлашда биринчи бўлиб ёрдам берамиз» деди у.
Қарорга мувофиқ, шифокорлар, ҳамширалар ва соғлиқни сақлаш соҳасидаги бошқа мутахассислар, шунингдек федерал агентликлар томонидан белгиланган янги коронавирус билан курашиш учун «муҳим» ишларни амалга ошириш учун мамлакатга келган бошқа иммигрантлар истисно ҳисобланади.
Шунингдек, Америка фуқароларининг турмуш ўртоқлари ва вояга этмаган болалари, H-1B виза дастуридаги малакали ишчиларга ҳамда EB-5 виза дастуридаги АҚШга сармоя киритишни истаган чет элликларга таъсир қилмайди.
Bloombergнинг маълум қилишича, ушбу қарор АҚШда доимий яшаш бўйича ариза топшираётган кишиларга таъсир қилади, лекин амалдаги виза ва бошқа рухсатнома эгаларига эмас.
The New York Times нашрининг аниқлик киритишича, чекловлар Н-1 В визаси билан мамлакатга келмоқчи бўлган қишлоқ хўжалиги соҳасидаги ишчилар ва мутахассисларга таъсир қилмайди. Бундан ташқари, ЕВ-5 виза дастури бўйича АҚШга ташриф этмоқчи бўлган инвесторлар ҳам истисно ҳсиобланади.
Вашингтонда жойлашган Миграция сиёсати институти таҳлилига кўри, Трампнинг қарори ойига 20 мингдан ортиқ кишининг Грин карта олишига тўсқинлик қилиши мумкин.
Маълумот учун, Трамп миллий фавқулодда ҳолат эълон қилганидан бери 22 миллиондан ортиқ америкаликлар ишсизлик учун ёрдам сўраб мурожаат қилди.
