Ўзбекистон Соғлиқни сақлаш вазирлиги кронавирус тасдиқланган яна беш нафар беморнинг тўлиқ соғайгани ҳақида хабар қилди. Тўрт кишининг Бухорода, бир кишининг эса Хоразм вилоятида тузалгани қайд этилди. Жами соғайганлар сони 66 нафарга етди.
Бухоро вилоят юқумли касалликлар шифохонасидан даволаниб чиққан беморларнинг икки нафари (бири Андижон, бири Тошкент вилоятидан) Бухорога Туркиядан келган. 26 март куни уларда коронавирус инфекцияси тасдиқланган. Яна фарғоналик икки бемор эса чартер рейс орқали Россиядан Бухорога келган.
Хоразм вилоят юқумли касалликлар шифохонасидан чиқарилган 32 ёшли бемор (Сурхондарё вилоятида туғилган) эса Урганчга чартер рейс билан Россиядан келган. Унда коронавирус 25 март куни аниқланган.
Аввалроқ, якшанба куни Вирусология илмий-тадқиқот инстититути клиникасида даволанган 19 кишининг соғайгани хабар қилинган эди.
Барча собиқ беморлар реабилитацияга жўнатилди.
