Карантин даврида Халқ банки томонидан пенсия тўловлари пенсионерларнинг яшаш манзилига етказилмоқда.
Маълумотга кўра, карантин бошлангунга қадар Халқ банкининг мавжуд сайёр кассалари 1 662 тани ташкил этган бўлса, эндиликда қўшимча равишда 516 та сайёр касса фаолияти йўлга қўйилган ва уларнинг умумий сони 2 178 тага етди. Бундан ташқари, Марказий банкнинг инкассация хизмати машиналари ва ҳокимликлар томонидан ажратилган машиналар ҳам пенсия пулларини тарқатишга жалб этилган.
Марказий банк департамент директорининг ўринбосари Акмал Назаровнинг аниқлик киритишича, агарда пенсионер вақтинчалик бошқа худудда яшаётган бўлса, маблағлар Пенсия жамғармасига қайтарилади ҳамда тўланмай қолган ушбу маблағлар кейинги ойда қўшиб тўлаб берилади. Лекин, пенсионер яшаш жойини ўзгартирган бўлса, биринчи навбатда ушбу ҳудуддаги Пенсия жамғармасининг бўлимига пенсия тўловларини у вақтинча яшаб турган ҳудуд бўйича тўлов қайдномасига (манзилларини аниқ кўрсатган ҳолда) киритиш ва молиялаштиришни сўраб, мурожаат қилиши мумкин.
10 апрель ҳолатига кўра, республика бўйича 3,0 млн. нафардан ортиқ пенсия ва нафақа олувчи фуқароларнинг 80 фоиздан ортиғига пенсия пуллари етказилган, дея хабар берди Назаров.
Марказий банк вакили Халқ банкининг 11−06 ишонч телефони узлуксиз ишлаётганлигини, лекин пенсия ва нафақа олувчилар томонидан бир кунда минглаб мурожаатлар бўлаётгани сабабли, оператор жавобини бироз кутишга тўғри келаётганлигини таъкидлади.
Марказий банк пенсия пулларини нақд шаклда олаётган пенсионерларга Халқ банкининг шахсий пенсия-овердрафт карталарини очиш ва келгусида пенсия маблағларини банк карталарига ўтказишни тавсия этмоқда. «Ҳозирги таҳликали шароитда нақд пуллардан фойдаланишдаги хатарни ва айни пайтда барча банк хизматларидан мобиль иловалар орқали фойдаланиш мумкинлигини ҳисобга олсак, бу тўғри ва қулай йўлдир», — дейилади хабарда.
