Қайд этилишича, қонунчиликда эпидемия юз берганда фавқулодда ҳолат, фавқулодда вазият ёки чекловчи тадбирлар (карантин)ни жорий қилиш кўзда тутилган.
«Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида"ги Қонунга мувофиқ, одамлар қурбон бўлишига, уларнинг соғлиғи ёки атроф табиий муҳитга зарар етишига, жиддий моддий талафотлар келтириб чиқаришга ҳамда одамларнинг ҳаёт фаолияти шароити издан чиқишига олиб келиши мумкин бўлган ёки олиб келган авария, ҳалокат, хавфли табиий ҳодиса, табиий ёки бошқа офат натижасида муайян ҳудудда юзага келган ҳолат фавқулодда вазият, деб аталади.
Ўзбекистон Конституциясига мувофиқ, мамлакатда фавқулодда ҳолатни президент жорий этади, давлат раҳбари қабул қилган қарор уч кун ичида Ўзбекистон Олий Мажлисининг палаталари тасдиғига киритилади.
Вазирлик изоҳига кўра, фавқулодда ҳолат режими жорий этилганда, ҳаракатланиш эркинлигига, транспорт воситалари ҳаракатига нисбатан чекловлар ўрнатилади, уларни текшириш кучайтирилади, энг зарур озиқ-овқат маҳсулотларини сотиш, харид қилиш ва тақсимлашнинг, жамоатчилик тартибини сақлашнинг алоҳида тартиби ўрнатилади ва бошқа чекловлар кучайтирилади.
«Аҳолининг санитария-эпидемиологик осойишталиги тўғрисида"ги Қонунига кўра, чекловчи тадбирлар (карантин) — юқумли ва паразитар касалликлар тарқалишининг олдини олишга қаратилган, хўжалик фаолияти ва бошқа фаолиятнинг алоҳида тартибини, аҳоли, транспорт воситалари, юклар ва (ёки) товарлар ҳаракатланишининг чекланишини назарда тутадиган маъмурий, тиббий-санитария чора-тадбирлари ва бошқа чора-тадбирлардир.
Таъкидланишича, ҳозирги кунда Ўзбекистонда эпидемияга қарши ўтказилаётган чора-тадбирлар (санитар муҳофаза, дезинфекция тадбирлари, мажбурий тиббий текширув ва бошқалар) айнан «Аҳолининг санитария-эпидемиологик осойишталиги тўғрисида"ги қонунда кўзда тутилган ҳаракатларга мувофиқ.
«Ўзбекистон Республикасида коронавирус инфекциясига қарши курашда юқоридаги тартиблардан нисбатан энг юмшоғи — чекловчи тадбирлар (карантин) жорий этилди. Чекловчи тадбирлар (карантин)нинг жорий этилиши мамлакатимизнинг амалдаги қонунчилигига мос келади. COVID-19 га қарши кураш Ўзбекистон Республикасининг «Аҳолининг санитария-эпидемиологик осойишталиги тўғрисида"ги қонуни, давлатимиз раҳбарининг фармонлари ва ҳукумат қарорларига мувофиқ амалга оширилмоқда», — дейилади вазирлик хабарида.
