БМТ террористларнинг ҳаракатланишини кузатиш ва уларнинг бошқа мамлакатларга кўчиб киришига йўл қўймасликка ёрдам берувчи чора-тадбирларни ишлаб чиқди. Бу борада биринчи ҳисобланган стратегия 7 май куни Нью-Йоркда БМТнинг Контртеррор бошқармаси раҳбари Владимир Воронков тақдим этди, дея хабар берди БМТ Янгиликлар маркази.
БМТ бош котиби Антониу Гутерриш учрашувда сўзга чиқар экан, сўнгги бир неча йилда бир ожаролар ҳудудидан бошқасига кенг миқёсда ҳаракатланаётгани кузатилаётганини эслатиб ўтди. «Икки йилча аввал биз Сурия ва Ироқдаги террористик гуруҳларга дунёнинг 110 давлатидан 40 мингга яқин чет эллик жангарилар қўшилганини аниқлаган эдик», — деди у.
Жуда кўплаб террорчилар аллақачон Хавфсизлик кенгаши санкцион рўйхатига киритилган, бу уларнинг сафарлар бўйича халқаро тақиқда эканини англатади. Бироқ улар ушбу тақиқни айланиб ўтмоқда.
Сурия ва Ироқдаги ҳарбий йўқотишлар ва ҳудуд устидан назоратни бой берганидан сўнг ИШИД ва бошқа террористик тузилмалар яширин минтақавий тармоқларни кенгайтиришга ўтди. Жангарилардан айримлари ватанига қайтиш, бошқа можароли ҳудудлардаги гуруҳларга қўшилиш ёки хавфсиз бошпана топишга ҳаракат қилмоқда.
Уларнинг кўпчилиги жуда яхши ўқитилган ва янги жойлашган ерида терактларни амалга ошириши мумкин. Қоидага кўра, террористик ташкилотлар жангариларни сохта сафар ҳужжатлари билан таъминловчи криминалитетлар билан яқин ҳамкорлик қилади.
БМТ дастури террорчиларни аниқлаш ва террористик ҳужумларнинг олдини олиш мақсадларида чегара пунктлари, жумладан аэропортларда назорат, текширув ва кўздан кечириш жараёнларини мустаҳкамлашга чақиради.
Аввалроқ БМТ Хавфсизлик кенгаши ўз резолюцияларидан бирида авиацион компаниялардан санкцион рўйхатдаги шахсларни аниқлаш учун ҳукуматларга олдиндан йўловчилар тўғрисидаги маълумотларни тақдим этишни талаб қилган эди. Бундай олдидан огоҳлантириш тизими аэропортларда текширув ва кўздан кечириш жараёнларини мустаҳкамлаш ҳамда аэропортлар хавфсизлигини таъминлашга қаратилгандир.
