Ўзбекистон Қуролли Кучлари Бош штаби жанговар тайёргалик бош бошқармаси томонидан Халқ таълими вазирлиги қошидаги «Сен ёлғиз эмассан» республика болалар жамоатчилик жамғармаси билан ҳамкорликда Тошкент шаҳридаги 22- ва 23-сон Меҳрибонлик уйи тарбияланувчилари билан Мудофаа вазирлиги Тоғ тайёргарлиги ўқув-машиқлари марказига экскурсия уюштирилди. Бу ҳақда вазирлик матбуот хизмати «Газета.uz"га хабар берди.
Меҳрибонлик уйларида ташкил этилган ҳарбий-спорт гуруҳларининг 70 нафар тарбияланувчилари тоғ спорти турларининг альпинизм, қояни забт этиш, шунингдек, от миниш, экстремал шароитларда яшовчанлик асослари ва кичик калибрли милтиқдан отиш тайёргарлиги элементлари бўйича бошланғич билим олиб, амалий кўникмага эга бўлишди.
Шу билан бирга ёшларга марказ тоғ-йўриқчилари ва соҳа бўйича катта тажрибага эга бўлган спорт усталари томонидан ҳарбий ватанпарварлик ва тоғ спорти турлари бўйича маърузалар қилиниб, ўқув фильмлари намойиш этилди.
Таъкидлаш керакки, бу каби тадбирлар ёшларни ҳарбий ватанпарварлик руҳида тарбиялаш, уларни жисмонан соғлом ҳамда етук камол топтириш йўлида ўтказилмоқда.
