Ўзбекистондаги барча мактабгача таълим муассасалари ўзбек ва рус тилларидаги ривожлантирувчи босма материаллар билан бепул таъминланади, дея хабар қилди Мактабгача таълим муассасаси матбуот хизмати «Газета.uz"га.

Ўқув-услубий тўплам таркибига ҳуснихат дафтарлари, мавзуга оид режалаштириш бўйича журналлар, болаларнинг турли ёшдаги гуруҳлари учун карточкалар ва плакатлар киради. Лойиҳага жалб этилган инвестициялар миқдори 8 млрд сўмни ташкил этди. Январь якунига қадар мактабгача таълим муассасаларига 270 мингта ҳуснихат учун дафтарлар, 18 мингта карточкалар тўпламлари, 10 мингта плакатлар тўплами етказиб берилади. Тарбиячиларга болалар билан машғулотларни ташкил этиши учун мавзуга оид режалаштириш бўйича журналлар тақдим этилади.

«Карточкаларнинг бир тўплами мебель, кийим-бош, ҳайвонот олами, транспорт, сабзавотлар, бўғинлар, рақамлар ва бошқа турли мавзулардаги 27та кичик тўпламлардан иборат. Ўхшаш тартибда плакатлар тўплами ҳам йиғилган бўлиб, у чолғу асбоблари, йўл ҳаракати қоидалари, касблар, йил фасллари каби ва бошқамавзуга оид 20та плакатлар тўпламини ўз ичига олади. Республиканинг ҳар бир мактабгача таълим муассасасига унинг катталигига боғлиқ ҳолда 1 дан 3 тагача тўпламлар ажратиб берилади, бу эса гуруҳлар ўртасида кичик тўпламларнинг вақти-вақти билан алмашиниши шарти билан 100 фоиз болаларни ривожлантирувчи босма маҳсулот билан таъминлаб беради. Мактабгача таълим муассасасининг ҳар бир 6 ёшли тарбияланувчиси ҳуснихатга эга бўлади», — дейилади МТВ хабарида.

Биринчи навбатда, республиканинг қишлоқ ҳудудларидаги мактабгача таълим муассасалари босма материаллар билан таъминланиб, ушбу ҳолат уларнинг моддий-техник базасини яхшилаш имконини беради. Вилоятлардаги мактабгача таълим муассасаларига ҳуснихатларнинг 83 фоизи, плакатларнинг 90 фоизи ва ривожлантирувчи карточкаларнинг 89 фоизи етказиб берилади.

Қўлланмалар майда моторикани, эътиборни, фикрлаш ва тасаввур этишни ривожлантириш учун мўлжалланган вазифалардан, шунингдек, боланинг қўлини хатга тайёрловчи анъанавий машқлардан ва мантиқий вазифалардан иборат. Ўзбек, рус ва инглиз тилларидаги ранг-баранг карточкалар билиш жараёнларини фаоллаштиришга ҳамда бардош, тоқат, юқори натижаларга эришишга интилиш ҳиссиётларини кучайтиришга ёрдам беради.

«Ота-оналар шуни ёдда тутиши керакки, барча материаллар бепул асосда тақдим этилади. Мактабгача таълим муассасаси маъмурияти томонидан суиистеъмоллик ҳолатларига йўл қўйилган ҳолда, бу ҳақда қуйидаги телефон рақами орқали хабар беришингизни сўраймиз: +99871 215−52−79», — дейди Мактабгача таълим вазирлиги Сифат назорати бошқармаси бошлиғи ўринбосари Виталий Ким.

Ҳар бир мактабгача таълим муассасаси ривожлантирувчи тўпламларни олиш жараёни ва тасдиғини Мактабгача таълим вазирлигининг www.mdo.uz расмий сайти орқали текшириш мумкин.