21 октябрь куни Тошкентнинг Учтепа тумани Изза даҳасида жойлашган POWER AUTO GAS МЧЖга қарашли автомашиналарга газ қуйиш шохобчасида ВАЗ 2106 русумли автомобилнинг газ баллони портлади.
Халқ депутатлари Учтепа туман кенгашининг депутати Нуриддин Зайниддинов ўзининг Telegram-каналида маълум қилишича, портлаш натижасида автомашина орқа қисми ва кузов деталлари бўлакларга бўлиниб кетган. Машина газ баллони газ қуйиш шохобчаси ташқарисидаги йўл бўйида ўрта қисмидан тик ҳолатда ёрилган ҳолатда топилган.
Депутат хабарига кўра, сурхондарёлик Ш. М. бошқарувидаги автомобиль Тошкент вилояти Зангиота туманидан рўйхатдан ўтган, 80 литр ҳажмдаги метан газ ускунаси ўрнатилган ва шу йилнинг йил апрел ойида техник кўрикдан ўтган.
Бундан ташқари, ҳодиса содир бўлган жойда Учтепа тумани, 31-мавзеда истиқомат қилувчи вояга етмаган Учтепа тумани, 296-ўрта мактабнинг 9-синф ўқувчиси 2005 йил туғилган Б.Б. «ўнг оёқ сон тепа қисми урилиб шилинган яраси» жароҳати олгани аниқланган, воқеа жойида биринчи ёрдам кўрсатилган, касалхонага мурожаат қилмаган.
Ҳодиса жойида тегишли хизматлар суриштирув ишлари олиб бормоқда. Шунингдек, Халқ депутатлари Учтепа туман кенгашининг ЎзЛиДеПдан депутатлари ҳам воқеа жойига чиқиб, ҳодиса содир бўлган жойни кўздан кечирган, тегишли хизматлардан тезкор маълумотлар олинган.
