Индонезия пойтахти Жакарта шаҳрида III Параосиё ўйинлари давом этмоқда. Кеча сузиш баҳсларида ўзбекистонлик спортчилар 2та олтин, 2 та кумуш медалларини қўлга киритган эди. Бу ҳақда МОҚ матбуот хизмати хабар берди.
Бугун эса эрта тонгдан Камолахон Абдуллаева (узунликка сакраш, 4,71 м), Александр Свечников (найза улоқтириш, 67,92 м) ва София Бурханова (ядро улоқтириш, 14,59 м) терма жамоа ҳисобига навбатдаги олтин медалларни қўшиб қўйди. Қайд этиш лозимки, Камолахон Абдуллаева Параосиё ўйинларида аёллар ўртасида узунликка сакраш бўйича чемпионликни қўлга киритган ўзбекистонлик дастлабки спортчи бўлди.
Айни пайтда Ўзбекистон спорт делегацияси ҳисобида 5 та олтин ва 2 та кумуш медаллари мавжуд.
Бугун шунингдек ўзбекистонлик спортчилар енгил атлетиканинг бир неча йўналишида, сузиш, дзюдо, пауэрлифтинг, ўқ отиш баҳсларида совринли ўринлар учун кураш олиб борадилар.
