Ўзбекистон Республикаси президентининг 2018 йил 29 августдаги фармонларига мувофиқ мамлакатимиз билан самарали ҳамкорлик қилиб келаётган хорижлик ишбилармонлар, Тожикистоннинг бир гуруҳ давлат ва жамоат арбоблари Ватанимизнинг юксак мукофотлари билан тақдирланган эди.
31 август куни мамлакат тарихида биринчи марта чет элликларга Ўзбекистон Республикасининг давлат мукофотларини топширишга бағишланган тантанали маросим бўлиб ўтди. Унда президент Шавкат Мирзиёев нутқ сўзлади. Бу ҳақда Ўзбекистон презденти матбуот хизмати хабар берди.
— Бугун кўпмиллатли халқимиз Ўзбекистон Республикаси Мустақиллигининг 27 йиллигини кенг нишонламоқда, — деди президент. — Ушбу шонли тарихий санани биз билан биргаликда мамлакатимизнинг чет эллардаги кўп сонли дўстлари ва шериклари — давлат ва жамоат арбоблари, дипломатик корпус ва халқаро ташкилотлар, йирик хорижий компаниялар ва молия институтлари вакиллари байрам қилаётгани бизни қувонтиради.
Ҳаракатлар стратегиясига мувофиқ Ўзбекистон фаол ва очиқ ташқи сиёсат юритмоқда. Россия, Хитой, АҚШ, Жанубий Корея, Германия, Япония, Марказий Осиё давлатлари ва бошқа мамлакатлар билан ўзаро манфаатли алоқалар жадал ривожланмоқда. Жаҳоннинг етакчи компаниялари, банк ва консорциумлари, халқаро бизнес тузилмалари Ўзбекистон билан фаол ҳамкорлик қилмоқда.
— Биз шерикларимизнинг Ўзбекистон иқтисодиёт тармоқларини ривожлантиришга, йирик қўшма лойиҳаларни амалга оширишга, ижтимоий ва маданий-гуманитар алоқаларни мустаҳкамлашга қўшаётган катта ҳиссасини юксак қадрлаймиз, — деди давлат раҳбари.
Президент Шавкат Мирзиёев ўзбекистонлик таниқли тадбиркор, Россиянинг «USM Holding» акциядорлик жамияти таъсисчиси ва раҳбари Алишер Усмоновга «Эл-юрт ҳурмати» ордени, Россиянинг «ЛУКОЙЛ» очиқ акциядорлик жамияти президенти Вагит Алекперов ҳамда Германиянинг «КНАУФ» корхоналари гуруҳи иштирокчилари Кенгаши аъзоси Николаус Кнауфга «Дўстлик» орденларини топширди.
Шунингдек, Тожикистон Республикаси Бош вазири Қоҳир Расулзода, ташқи ишлар вазири Сирожиддин Муҳриддинга «Фидокорона хизматлари учун» орденлари топширилди. Ўзбекистон билан Тожикистон халқлари ўртасидаги дўстлик муносабатларини мустаҳкамлашга катта ҳисса қўшган маданият, фан ва соғлиқни сақлаш соҳалари вакилларига фармонга мувофиқ орден ва фахрий унвонлар берилди.
— Бундай маросим мамлакатимиз тарихида биринчи марта ўтказилди. Ўйлайманки, ҳамжиҳатлигимиз, бағрикенглигимиз ифодаси бўлган бу тадбир анъанага айланиб қолади. Ўзаро манфаатли ҳамкорлигимиз бундан буён ҳам ривожланиб, самимий дўстлигимиз ва ўзаро англашувимиз халқимиз фаровонлигига хизмат қилади, — дея таъкидлади Шавкат Мирзиёев.
Мукофотланганлар юксак эътибор, хорижлик инвесторларни қўллаб-қувватлаётгани учун давлат раҳбарига миннатдорлик билдирди.
