Ўзбекистон Адлия вазирлиги ўзининг Telegram-каналида 2017 йилда мамлакатда рўйхатга олинган туғилишлар ҳақидаги маълумотларни эълон қилди.
Йил давомида республикада 722094 туғилиш рўйхатга олинган бўлиб, 2016 йилга нисбатан 10490 та ёки 1,4 фоизга камайган. Янги туғилган гўдакларнинг 375192 нафари ўғил, 346894 нафари қиз болалардир.
Энг кўп Самарқанд вилоятида туғилишлар қайд этилган — 89637 ёки умумий миқдорнинг 12,4 фоизи, шаҳарлар бўйича эса энг кўп туғилиш Наманганда кузатилган — 14992 ёки 2 фоиз.
Бошқа вилоятлар билан солиштирилганда ўғил болалар Қашқадарё вилоятида 3395 та ёки 9,4 фоизга кўпроқ туғилган.
2017 йилда туғилган 5678 қиз болага Мадина, 5674 ўғил болага Азизбек исми қўйилган.
Йил давомида 14382 жуфтлик (туғилишлар жами сонининг 1,9 фоизи), 138 учлик ва 1 ҳолатда тўртлик эгизак дунёга келган. Тўрт бола Андижон вилоятининг Шаҳрихон туманида дунёга келган.
Энг оғир чақалоқ (қиз бола) вазни 9870 г, энг узун бўйли гўдак (ўғил бола) 70 см ни ташкил этди.
Жиззах вилоятининг Ғаллаорол туманида истиқомат қилувчи она ўзининг 9-фарзандини дунёга келтирди.
