Тўсиқлардан сакраб ўтиш бўйича FEI World Jumping Challenge Final мусобақаси Осиё қитъасида биринчи марта бўлиб ўтади, Ўзбекистон от спорти элитасини қабул қилади, дея хабар қилди Йилқичилик ва от спорти федерацияси «Газета.uz"га.
"Бизнинг мазкур спорт турини ривожлантириш бўйича дадил қадамларимиз Халқаро от спорти федерацияси учун кўплаб номзодлар, жумладан Эквадор, Португалия ва бошқа давлатлар орасидан айнан бизнинг мамлакатимизни танлаш учун туртки берди. Мусобақа финалига қадар дунёнинг 10 та минтақасидан «А» тоифасига саралаб олинган энг юқори натижаларга эга 20 спортчи етиб келади", — дейилади федерация хабарида.
Мусобақанинг Тошкент вилояти Бўстонлиқ туманидаги «Аллюр» от спорти клубида бўлиб ўтиши кутилмоқда. Ташкилотчиларнинг ваъда қилишича, мусобақага кириш бепул.
FEI World Jumping Challenge Final мусобақаси 2001 йилда Германиянинг «PSI» компанияси ташаббуси билан ташкил этилган бўлиб, дастлабки финал мусобақалари Европа қитъасида бўлиб ўтган, 2008 ва 2009 йилларда финал Америкага «кўчди». 2014 йилда эса финал мусобақаларини ўтказиш ҳуқуқи Африка қитъасига насиб этди.
