18 октябрь куни Лондонда Европа тикланиш ва тараққиёт банки (ЕТТБ) директорлар кенгаши Ўзбекистондаги дастлабки икки лойиҳани молиялаштиришни бир овоздан тасдиқлади. Бу ҳақда Сенатдан «Газета.uz"га хабар қилинди.
Ташқи иқтисодий фаолият миллий банки учун 100 млн доллар миқдоридаги кредит линиясини тақдим этиш тасдиқланди. Уларнинг 70 млн доллари кичик ва ўрта бизнес, 30 млн доллари эса савдо-сотиқни молиялаштиришни қўллаб-қувватлашга йўналтирилади.
Бундан ташқари, шарбатлар, шарбат концентратлари, мева пасталари ва бошқа маҳсулотлар ишлаб чиқаришга ихтисослашган «Agromir Juice» қўшма корхонаси учун 10 млн доллар миқдоридаги кредит линиясини ажратиш тасдиқланди. Мазкур кредит маблағлари Самарқанд вилоятида замонавий омборхона мажмуасини қуришга йўналтирилади.
ЕТТБ тасдиқлаган лойиҳаларни имзолаш жараёни ЕТТБ вице-президенти Филипп Беннетнинг ноябрнинг биринчи декадасида Ўзбекистонга ташрифи чоғида имзоланиши кутилмоқда.
Олий Мажлис Сенати раисининг ўринбосари ҳамда ЕТТБнинг Ўзбекистондаги миллий бошқарувчиси Содиқ Сафоев сўзларига кўра, эришилган ушбу келишув ЕТТБ томонидан молиялаштиришларнинг очилиши холос.
Ҳозирда банк Ўзбекистон вазирлик ва маҳкамалари иштирокида ЕТТБнинг давлат дастури лойиҳасини ишлаб чиқмоқда. Мазкур лойиҳанинг директорлар кенгаши томонидан тасдиқланиши халқаро молия институтларининг Ўзбекистон билан ўзаро алоқаларининг кенгайишига имкон яратади.
