Президент Шавкат Мирзиёев чоршанба куни Тошкентдаги «энг мураккаб» туманлардан бири -Чилонзор туманига ташриф буюрди, деб хабар қилди «Ўзбекистон» телеканалининг «Ахборот» дастури.

Давлат раҳбари йўлаклар ва турар жойлар бўйлаб юриб, «Яккатут» маҳалласи аҳолиси билан суҳбатлашди, хонадонлардан бирига ташриф буюриб, унинг соҳибларини ўйлантираётган муаммолар тўғрисида қизиқиб кўрди. Шавкат Мирзиёев хонадонлар, мактаб ва мактабгача таълим муассасалари ҳудудларини ободонлаштириш бўйича топшириқлар берди.

Президентга пойтахтда бунёд этиладиган намунали маҳалла марказлари лойиҳалари тўғрисида ахборот берилди. Улар сони 500 тани ташкил этади. Давлат архитектура ва қурилиш қўмитаси раиси ўринбосари Асомиддин Тожиевнинг таъкидлашича, уч турдаги маҳалла маркази лойиҳаси ишлаб чиқилган бўлиб, уларнинг ҳар бири ўзида ягона мажмуани мужассам этади.

«Авваллари маҳалла маркази ҳақида сўз кетганида қандайдир маълумотномаларни тарқатувчи амалдор ўтирадиган жой тушунилар эди», — деди у. Ҳозирда мутлақо янгича ёндашув: маҳалла, бу — «маданият ўчоғи, тарбия маркази, инсон умри ўтувчи маскан».

Президент лойиҳалар кам-кўстини тўлдириш ва янада яхшилаш вазифасини топширди. Маҳалла марказларида раис, унинг маслаҳатчилари ва профилактика инспектори учун бинодан ташқари, кутубхона, спорт билан шуғулланиш, катта ёшли авлод вакиллари ҳордиқ чиқарувчи жой, маиший хизмат кўрсатиш пунктлари ва новвойхона бўлади.

«Асосий вазифалардан бири — маҳаллалар функционал бўлиши ва хавфсизлик нуқтаи назаридан барча талабларга жавоб бериши керак», — дея қайд этди давлат раҳбари. У профилактика инспекторлари (участкавой) маҳаллада яшаши лозимлигини таъкидлади. Улар учун барча шароитлар яратилиши, улар қайта тайёргарликдан ўтиши лозим.

«Участкавойлар халқ олдида ҳисоб бериши, одамлар билан ҳамнафас бўлиб яшаш керак, одамларнинг дардини билиш керак. Участкавой ва маҳалла раисининг иши шунга боғлиқ. Улар халқ билан давлат ўртасида кўприк бўлиши керак», — деди Президент.

Шавкат Мирзиёев хусусий турар жой мулкдорлари ширкатлари тизимини такомиллаштириш, улар фаолияти самарадорлиги ва аҳолига кўрсатилаётган коммунал хизматлар сифатини ошириш зарурлиги тўғрисида маълум қилди. Асосий мақсад — одамлар учун максимал шароит яратиш.

«Туманнинг тўрт раҳбари мутлақо янги тизимда ишлашса, икки йилда одамларнинг кайфияти тўлиқ ўзгаради. Бироқ бунинг учун биз Тошкентимизни севишимиз, Ватанимизни севишимиз керак, Тошкент намунали шаҳар бўлиши лозим», — деди Президент.

Йўлаклар, подъездлар, мактаблар, коллежлар, бюджет ва бошқа ташкилотлар ҳақида сўзлар экан, Шавкат Мирзиёев улардан «маданият нафаси» уфуриб туриши лозимлигини таъкидлади.