Оғир атлетика бўйича Ўзбекистон аёллар терма жамоаси 2013 йилда бир неча спортчи қиздан олинган допинг таҳлилидаги ижобий натижалар сабабли Рио-де-Жанейрода бўлиб ўтадиган Олимпиада-2016 учун қўлга киритилган ягона йўлланмадан маҳрум қилинди. Оғир атлетика федерацияси расмий сайтида биринчи вице-президенти Шаҳрилло Маҳмудов сўзларидан иқтибос келтирилади.
Яқинда Тбилисида ўтказилган Халқаро Оғир атлетика федерацияси Ижроия қўмитаси йиғилишида допинг муаммоси кўтарилиб, Пекин ва Лондондаги Олимпиада ўйинларида қатнашган спортчилардан олинган допинг намуналарини қайта текширувдан ўтказишда бир қатор мамлакатлар спортчиларида ижобий натижалар аниқлангани маълум қилинди.
«Тан оламан, ўтган 8 йил давомида бизнинг спортчиларда ҳам эҳтиётсизлик оқибатида ман этилган тиклантирувчи воситалардан фойдаланилган ҳолатлар рўй берган. Бунинг учун федерация ўз зиммасидаги масъулиятни ҳис қилади ва бундан буён допингга қарши муросасиз курашга тайёр», — деди ОАФ вице президенти.
Унинг таъкидлашича, эркаклар жамоасининг 5 та йўлланмаси ўз жойида турибди. Олимпиадада эса асосан йигитлардан юқори натижалар кутилмоқда.
