8 июнь куни М-39 автомобиль йўлининг Жиззах вилояти Ғаллаорол туманидаги қисмида тўртта юк машинаси иштирокида ЙТҲ содир бўлди. Бу ҳақда вилоят ЙҲХБ хабар берди.
Қайд этилишича, Тошкент-Самарқанд йўналишида кетаётган MAN русумли юк автомобилида носозлик кузатилган ва ҳайдовчи бошқарувни йўқотган.
Автомобиль йўл четида тўхтаб турган юк машинаси, сўнг енгил машиналар ортилган автотрейлер ва яна бир юк машинаси билан тўқнашган.
ЙҲХБга кўра, ҳайдовчилар ва йўловчиларга жароҳатлар етмаган, машиналар эса жиддий зарар кўрган. Шунингдек, 2 км масофада сунъий тирбандлик ҳосил бўлган.
UzAuto Motors компаниясининг аниқлик киритишича, ЙТҲга учраган автотрейлерда Cobalt ва Equinox автомобиллари Сурхондарё вилоятидаги дилерлик марказига олиб кетилаётган бўлган.
Ҳодиса оқибатида компаниянинг 4 та Cobalt ва учта Equinox автомобили техник шикастланган.
Жиззах вилояти Йўл ҳаракати хавфсизлиги бошқармаси томонидан дастлабки тергов ҳаракатлари олиб борилмоқда.
