Тошкент вилоятида кўп миқдорда синтетик гиёҳвандлик воситаларининг тарқалиши олди олинди, деб хабар бермоқда ИИББ ахборот хизмати.
«Қора дори 2024» тезкор профилактик ойлиги доирасида ўтказилган тадбир давомида 33 ёшли фуқаро М.И. Бўстонлиқ тумани ҳудудида гумонланиб текширилган. Унинг ёнида бўлган автомобиль эҳтиёт қисми (редуктор) кўздан кечирилганда 12 та ўрамдаги, қора бозордаги тахминий нархи 4 млрд 800 миллион сўм бўлган 6 килограмм синтетик гиёҳвандлик воситаси топилган ва далилий ашё сифатида олинган.
Бундан ташқари, ушланган шахснинг уйида синтетик воситаларни кичик миқдорга ажратиб, қадоқлаш ва тарқатиш учун керакли воситалар борлиги маълум бўлган.
Ҳолат юзасидан Жиноят кодекси 273-моддаси 5-қисми (Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш / 10 йилдан 20 йилгача озодликдан маҳрум қилиш билан жазоланади) билан жиноят иши қўзғатилган. Тергов ҳаракатлари олиб борилмоқда.
Дастлабки суриштирувга кўра, унга ушбу синтетик гиёҳвандлик воситалари Telegram бот орқали Қирғизистондан водий вилоятлари орқали етказиб берилгани аниқланган.
Синтетик гиёҳвандлик воситаларининг манбасини аниқлаш бўйича қидирув давом этмоқда.
