Шавкат Мирзиёев 24 май куни мактаб таълимини битираётган ўқувчиларга табрик йўллади.
«Бугун ўз билим ва истеъдоди, куч-ғайратини Янги Ўзбекистон бунёдкори, жонажон юртимизга муносиб фарзанд бўлишдек эзгу мақсадга бахш этишга бел боғлаган сизлар каби навқирон ёшларни мактаб таълимини муваффақиятли тугатаётганингиз билан чин қалбимдан самимий табриклайман», — дея бошлади у табрик хатини.
Давлат раҳбарининг таъкидлашича, барча мактабларда «сўнгги қўнғироқ»лар жаранглаб, минглаб ёшлар катта ҳаётга йўлланма олмоқда, улар «улкан имкониятлар тақдим этадиган бутунлай янги ҳаёт» остонасида турибди.
«Бу йўлда тинимсиз изланиб, янги марралар сари талпиниш, дадиллик ва ўзингизга қатъий ишонч ҳисси доимо ҳамроҳингиз бўлиши лозим. Ҳамиша ёдингизда тутинг, ҳар бирингиз ўзига хос истеъдод соҳибисиз, уларни рўёбга чиқариш эса аввало ўзингизга, тинимсиз интилиш ва изланишларингизга боғлиқ», — дея қайд этди президент.
Шавкат Мирзиёев битирувчилар сафида ўқишни олтин ва кумуш медаллар билан тамомлаётган юзлаб ўқувчилар борлигига тўхталди. Кейинги йилларда Ўзбекистон ёшлари турли фанлар, спорт, санъат ва адабиёт соҳаларида ўзининг чуқур билим ва қобилиятини намоён қилаётгани таъкидланди.
«Ҳаётда юксак марраларни кўзлаб турган бундай серғайрат ва билимдон фарзандларимизни юртимиздаги миллионлаб ўғил-қизларимизга ўрнак қилиб кўрсатсак, арзийди», — деди у.
Давлат раҳбарининг таъкидлашича, мамлакат келажаги, унинг тақдири ва тараққиёти ёшларнинг қўлида, шу сабабли уларни «баркамол инсонлар этиб тарбиялаш, уларнинг қонуний ҳуқуқ ва манфаатларини таъминлаш, қобилият ва салоҳиятини рўёбга чиқаришга жуда катта эътибор қаратилмоқда».
«Улар эртага Ўзбекистонни янада кучли, ривожланган ва бахтли давлатга айлантириш учун ўзларининг бор билими, иқтидори ва куч-ғайратини сафарбар қилса, кўзлаган мақсадларимизга албатта эришамиз», — дейилади президент табригида.
Шавкат Мирзиёев ёшларга ҳеч қачон орзу қилишдан тўхтамасликни айтди: «Катта мақсадлар йўлида имкониятларингизни синаб кўришдан, бу йўлда хато қилиш ва улардан сабоқ олишдан қўрқманг. Чунки халқимиз сизларга катта умид ва ишонч билан қарамоқда».
«Сизларнинг янги ғоя ва ташаббусларингиз, иштиёқингиз ва кучингиз нафақат Ўзбекистонни, балки бутун дунёни ўзгартириши мумкин. Шунинг учун ҳар қандай ҳолатда ҳам ўз олдингизга қўйган эзгу мақсадингиздан ортга чекинманг», — дея таъкидлади президент.
