Шавкат Мирзиёев 20 май куни банкларнинг хорижий сармояларни жалб этишдаги иштирокига бағишланган тақдимот билан танишди.
Давлат раҳбари матбуот хизмати хабарига кўра, сўнгги 5 йилда банкларнинг капитали икки баробар, кредит портфели 2,3 баробар, йиллик кредитлаш ҳажми эса 1,8 баробар ошди.
Тўртта банк биринчи марта еврооблигациялар чиқарди ва 1,3 миллиард доллар жалб этди. Ўтган йили банклар 3,8 миллиард доллар хорижий кредитларни жалб қилган, уларнинг йирик мижозлари эса ҳукумат кафолатисиз тўғридан-тўғри 6 миллиард доллар жалб қилган, дейилади хабарда.
Тақдимотда Ўзбекистон Миллий банки (Ўзмиллийбанк) ва «Ўзсаноатқурилишбанк» (SQB)нинг мазкур йўналишдаги фаолияти ҳақида маълумотлар берилди.
2023 йил якуни бўйича Миллий банк активлари ҳажми 128 триллион сўм, кредит портфели 99 триллион сўм, хорижий кредит линиялари 55 триллион сўм, депозитлар ҳажми 33 триллион сўм, соф фойда 1,7 триллион сўмни ташкил этади.
Жорий йилда Миллий банк томонидан умумий қиймати 6 миллиард доллар бўлган лойиҳалар: заргарлик саноатида 2,1 триллион сўмлик 526 та лойиҳа ва хизмат кўрсатиш соҳасида 41,8 триллион сўмлик кредитлар ҳисобидан 40 мингдан ортиқ лойиҳа амалга оширилиши режалаштирилган. Натижада 2,5 миллиондан ортиқ киши иш билан таъминланиши кутилмоқда.
«Ўзсаноатқурилишбанк»нинг активлари 82,3 триллион сўмга, кредит портфели 59,5 триллион сўмга етди. Банк жорий йилда халқаро молия бозорида 3,1 миллиард долларлик қарз маблағларини жалб қилишни режалаштирмоқда. Банк мижозлари умумий қиймати 4,8 миллиард долларлик инвестиция лойиҳаларини амалга оширишни бошлади.
Банк 2024−2025 йилларда қурилиш материаллари саноатига 529 та лойиҳа орқали 2,8 миллиард доллар хорижий инвестициялар жалб этишни мўлжалламоқда, бунинг натижасида 25 минг иш ўрни яратилиши керак.
Президент матбуот хизмати хабарига кўра, Миллий банк 967 та, Саноатқурилишбанк 727 та маҳаллада ишсиз аҳоли бандлигини таъминлашга кўмаклашмоқда. «Банклар қуйи бўғинга тушиб ишлаётгани учун кўплаб бизнес тузилмалар «соя»дан чиқмоқда», — дейилади хабарда.
Президент мижозларнинг инвестиция лойиҳаларини тизимли мониторинг қилиш, юзага келаётган муаммоларни тезкорлик билан ҳал этиш зарурлигини таъкидлади.
