Ҳиндистоннинг Мумбай шаҳрида реклама баннери қулаши оқибатида камида 14 киши ҳалок бўлди, ўнлаб кишилар жароҳатланди, деб хабар бермоқда BBC News.
13 май куни тушдан кейин жала ва чанг бўрони вақтида Гаткопар туманидаги турар жой бинолари ва ёқилғи қуйиш шохобчаси устига 70×50 метр ўлчамдаги реклама баннери қулаб тушган.
Воқеа жойидан олинган кадрларда реклама иншооти гавжум йўл яқинидаги бинолар устига қулашдан олдин шамолда чайқалаётганини кўриш мумкин.
Фавқулодда хизматлар қутқарув операциясини давом эттирмоқда; бир қанча қурбонларнинг жасадлари ҳали ҳам баннер остида.
https://twitter.com/HTMumbai/status/1790005731795570994?ref_src=twsrc%5Etfw%7Ctwcamp%5Etweetembed%7Ctwterm%5E1790005731795570994%7Ctwgr%5E5c975465a632c79aeab6c72ac325f9534b62a6e8%7Ctwcon%5Es1_c10&ref_url=https%3A%2F%2Fwww.gazeta.uz%2Fru%2F2024%2F05%2F14%2Fmumbai%2F
Маҳаллий ҳокимлик билборднинг ўлчами рухсат этилган ўлчамдан бир неча баробар катта эканини ва реклама агентлиги уни ноқонуний равишда ўрнатганини маълум қилди. Компанияга конструкцияни зудлик билан демонтаж қилиш ва шаҳар атрофидаги барча ана шундай реклама баннерларини олиб ташлаш буюрилган.
Times of India нашрининг аниқлик киритишича, компания масъул идоралардан рухсат олмасдан жами саккизта билборд ўрнатган. Йиқилган иншоотнинг оғирлиги 250 тоннани ташкил этган.
Маҳаллий оммавий ахборот воситаларининг ёзишича, кучли шамол дарахтларни илдизи билан юлиб кетган, йўлларда тартибсизлик ва шаҳарда электр таъминотида узилишлар юзага келган. Ноқулай об-ҳаво туфайли халқаро аэропортда бир нечта рейслар кечиктирилган.
