10 май куни эрталаб Ереванда фуқаролик итоатсизлиги акциялари бошланди, деб ёзади «News.am». Намойишчилар Озарбайжонга ҳудудий ён беришларга қарши чиқишмоқда, шунингдек, Арманистон бош вазири Никол Пашинянни истеъфосини талаб қилмоқда. Норозилик намойишлари маҳаллий ахборот порталларида онлайн трансляция қилинмоқда.
Акцияларнинг ташаббускори Тавуш епархияси раҳбари архиепископ Баграт Галстанян эди. У 4 май куни чегарадаги Кирантс қишлоғини тарк этиб, намойишчилар бошлаган «Ватан учун Тавуш» норозилик маршини бошқарди. 9 майга келиб улар Ереванга етиб келишди, у ерда минглаб одамлардан иборат митинг бўлиб ўтди. Deutsche Wellе нашрининг ёзишича, Арманистоннинг постсовет тарихида биринчи марта норозилик акцияси черков томонидан ўтказилди.
«Бизда норозиликни билдиришнинг бошқа иложи йўқ. Ва бу муаммо нафақат Тавушдаги кичик қишлоқларга, балки бутун мамлакатимизга тегишли», — деди Галстанян.
Намойишчиларга мамлакатдаги бир қанча университет талабалари ҳам қўшилди, Сициан қисмида Арманистон-Эрон автомобиль йўлини юк машинаси билан тўсиб қўйишди.
Би-би-си рус хизматининг қайд этишича, юриш бошланишидан бир неча ҳафта олдин чегара қишлоқлари аҳолиси маҳаллий даражада норозилик билдирган, аммо натижа бўлмаган. Намойишларга Арманистон ва Озарбайжон чегарасидаги келишмовчилик сабаб бўлган. 19 апрель куни Арманистон ташқи ишлар вазирлиги мамлакатлар чегаранинг кичик қисмини делимитация ва демаркация қилиш бўйича аввалроқ келишиб олганини маълум қилди. Ҳужжат чегарадаги тўртта қишлоқни расмий Еревандан Бокуга ўтказишни назарда тутади.
Кирантс ва бошқа яқин аҳоли пунктлари аҳолиси Озарбайжон чегара яқинидаги ерларни назорат остига олса, уйларини тарк этишга мажбур бўлишидан хавотирда, дея аниқлик киритади BBC.
Пайшанба куни Еревандаги Республика майдонида ўтказилган митингда, турли ҳисоб-китобларга кўра, 31 мингдан 60 минггача одам йиғилган. Галстанян йиғилганлар номидан Пашинянга ишончсизлик вотумини Миллий Ассамблеяда (Арманистон парламентида) сўрашларини билдирди.
«Ватан, давлатчилик, марҳум ўғлонларимизнинг қони ва ҳаёти қадрига етсангиз [митингга чиқинг]. Қанчалик қийин бўлмасин, кейинги 2−3 кун ичида ғалабамизни қийинчиликда қўлга киритишимиз учун бу азобларни бошдан кечиришимиз керак. Бошқа йўл йўқ», — деди у намойишчиларга.
Мухолифатдаги парламент кучлари бош вазирга ишончсизлик вотуми жараёнини бошлашга тайёр эканликларини билдирдилар, бироқ улар ҳукмрон «Фуқаролик келишуви» партиясининг қўллаб-қувватлашига муҳтож эканини таъкидладилар. Партия вакиллари эса, уларнинг фикрича, етакчилари Арманистоннинг собиқ президенти Роберт Кочарян таъсирида ҳаракат қилаётган норозилик ҳаракати билан музокаралар олиб боришдан маъно кўрмаслигини аллақачон маълум қилган.
