2024 йилнинг 15 апрель куни Бўстонлиқ туман тиббиёт бирлашмасининг туғуруқ бўлимида 29 ёшли ҳомиладор аёл ва унинг бўлажак фарзанди вафот этди.
Тошкент вилояти прокурори ёрдамчиси Асатулла Фатҳуллаев ҳолат юзасидан туман прокуратураси терговга қадар текширув ишларини бошлаганини маълум қилди. Унинг ўлими сабабини аниқлаш мақсадида суд тиббий экспертизаси тайинланган. Мазкур ҳолат Тошкент вилояти прокуратураси томонидан назоратга олинган.
Millar теледастури марҳуманинг опаси ва турмуш ўртоғи билан уюштирилган видеосуҳбатни эълон қилди.
Тиббиёт дафтарида ёзилганига қарамай, унга аллергия берадиган дорини ёзиб беришган
«2023 йил 24 августда оила қурганмиз. Аёлим ҳомиладор бўлди. Апрелда марказий шифохонага бордик, гинеколог аёлимни кўриб, баданингиз, қўлингизда озгина шиш, сув йиғилиши бор, сизни назоратга оламиз, деб айтди. Мен ўз ишларим билан шаҳарга кетдим… Тиббиёт дафтарида унга аллергия берадиган уколлар мутлақо қилинмаслиги кераклиги ҳақидаги эслатмалар ёзилган. Шунга қарамай, аллергия берадиган дорини аёлимга ёзиб беришган», — деди марҳуманинг эри.
Аёлнинг опаси: «Агар ётмасанг, бола ичингда димиқиб қолади», дейишибди
«Докторлар унга дори ёзиб берган. Рецептни олиб қарасам антибиотик экан. Дорини бериб, бундан аллергиянг бор, деб айтдим. У «проба» (синов) қилишар экан, олмасам бўлмас экан, деди. Ҳеч қаери оғримаётганини айтганди. Менга синглимнинг мазаси йўқлиги, «судороги» тутиб қолганини айтишди. Кирсам, уни жонлантириш бўлимидан олишган, оғзидан кўпик оқиб ётган эди. Синглим бироздан сўнг ўзига келди. «Болам», «турғизинглар, аййй» деб роса бақирди-да, шу билан ўчди.
Ичида бола дарров ўлган. Синглимнинг биринчи фарзанди эди, зурриёдсиз қолди", — дейди опа.
Антибиотик инекцияси беморга оғир аллергик реакция берган
Тиббиёт бирлашмаси реаниматологининг сўзларига (шифохона масъуллари ўзини таништирмаган) кўра, ҳомиладорлар потологи бўлимида беморга антибиотик инъекцияси қилингандан сўнг, оғир аллергик реакция, анофилактик шок даражасининг хавфли формаси кузатилган. Шу заҳоти бўлимга шифокорлар чақиртирилиб, беморга хонанинг ўзида шошилинч тез тиббий ёрдам кўрсатилган. Аҳволи ўта оғирлиги сабабли у жонлантириш бўлимига ўтказилган.
«Реанимацион чора-тадбирлар давом эттирилган, керакли муолажалар қилинган, керакли текширувлар олиб борилган. Шу ўртада беморнинг аҳволи ўта оғирлигича сақланиб қолган. Керакли мутахассислар уни кузатиб, жарроҳлик муолажасини ўша жараёнда ўтказган. Лекин, шунга қарамай, беморда биологик ўлим кузатилган», — деди шифокор.
Бўстонлиқ тумани тиббиёт бирлашмаси раҳбари ўринбосари бу масала бўйича навбатчи ҳамширага тегишли чора кўрилганини айтди. Шифокор ишдан четлатилди, дея изоҳ берди у.
«Аёлим фарзандим билан қўлимда жон берди»
Аёлнинг эри унга пульс тушгандан сўнг тинчлантирувчи дори қилишганини, бадани кўкариб кетганини айтди. Бундан ташқари, унинг 7,5 ойлик ҳомиласи нобуд бўлганини қўшимча қилди. «Аёлим 2 кундан ортиқ комада ётди. Туш вақти ўғлимни олиб, кўмиб келдим. Кетидан аёлимни ҳам экспертизадан олиб, кечаси кўмиб келдим. Мен аёлимни реанимацион бўлимда ётган пайти далда бериш учун гапларимни айтгандим. Аёлим барибир фарзандим билан қўлимда жон берди», — дейди эркак.
Эркак аёлига нега рухсат этилмаган дори урилганини сўроқ остига олиб, аёлининг соғлиғига беэътибор бўлганларга қонуний чора кўрилишини сўраган.
