11 апрель куни соат 10:00 ларда Фарғона вилояти тарихи ва маданияти давлат музейида ёнғир содир бўлди, оқибатда ноёб экспонатлар ёниб кетди, деб хабар бермоқда Kun.uz.
Нашр манбасига кўра, ёнғин иккинчи қаватдаги экспозиция залида содир бўлган. Ҳолат жамоатчиликдан сир тутилган, дейилади хабарда.
Ҳолатни тасдиқлаган музей раҳбари Хайрулло Зокировнинг айтишича, ёнғин эскирган электр симларининг қисқа туташуви ортидан келиб чиққан.
«Ёнғинда фақат 1 дона витрина ёниб, милтиқ қўндоғи ва нақшли эшик буткул ёниб кетган. Витрина ва музейнинг ёнган қисми эса таъмирланган. Рассом Гаврилов томонидан 1938 йилда чизилган, 1916 йил қўзғолони акс этган санъат асари қисман зарарланган», — деб ёзади нашр.
Хабарда қўшимча қилинишича, музей раҳбари ҳолат вилоят бадиий экспертизаси ходимлари томонидан ўрганилаётгани сабабли ичкарига киришга рухсат бермаган. У етказилган моддий зарар миқдори ўрганилаётганини айтган.
«Газета.uz»нинг ҳолат юзасидан маълумот олиш учун ФВВ матбуот хизмати билан боғланишга уринишлари натижасиз қолди.
