Шавкат Мирзиёев 8 апрель куни Жиззах шаҳрида қурилган Киберспорт аренасида ёшлар билан учрашди, деб хабар бермоқда президент матбуот хизмати.
Киберспорт аренаси собиқ теннис корти биноси ўрнида ташкил этилган бўлиб, асосий зали 1 минг 200 томошабинга мўлжалланган. Шунингдек, бу ерда 12 та ўқув ва машғулот хоналари, мажлислар зали, 35 ўринли ётоқхона ҳамда кафетерий мавжуд.
Арена универсал — бокс, кураш, баскетбол, стол тенниси, шахмат, шашка бўйича халқаро мусобақаларни ҳам, «Беш ташаббус» тадбирларини ҳам ўтказиш мумкин. Мажмуа таркибидаги IT академиясида ёшларга компьютер саводхонлиги, хорижий тиллар, график дизайн, дастурлаш, робототехника ва бошқа йўналишлар ўқитилади. Бу соҳада мутахассислар тайёрлаш бўйича «Муҳаммад ал-Хоразмий ворислари» тизимини амалга ошириш режалаштирилган.
Давлат раҳбари бу ерда киберспорт, шахмат, «Заковат» интеллектуал ўйинлари, баскетбол мусобақаларини кузатиб, ёшлар билан мулоқот қилди.
«Бугун Жиззахнинг кўп жойларида бўлдик, янги лойиҳаларни бошладик. Албатта, вилоятнинг иқтисодиёти, бунёдкорлик кўлами аввалгидан анча юқори. Лекин энг муҳим ютуқ — ёшларимизнинг ҳаракати, нияти, ўзига ишончи. Биз белгилаб олган стратегияни, катта марраларни шундай ёшлар билан амалга оширамиз», — деди президент.
Ташриф давомида мутасаддилар арена фаолиятига доир режалар хусусида сўзлаб берди. Хусусан, жаҳон чемпионатларида иштирок этиш учун турли даражадаги турнирлар ғолиблари билан дўстлик мусобақалари ўтказилади.
Президент ҳар бир йўналиш бўйича иқтидорли ёшларни аниқлаб, уларни профессионал спортга йўналтириш бўйича кўрсатмалар берди.
Шавкат Мирзиёев 21 февраль куни Россиянинг Қозон шаҳрида «Келажак ўйинлари» биринчи халқаро мультиспорт мусобақасининг очилиш маросимида иштирок этиб, мусобақани 2026 йилда Ўзбекистонда ўтказишни таклиф қилганди. «Ҳозир ёшлар компьютерда, киберспорт билан шуғулланмоқда. Ва агар улар ҳам киберспорт, ҳам анъанавий спорт турлари билан шуғулланса-чи? Биз бу орқали уларни бироз ҳаракатга келтирамиз», — деганди у Владимир Путин билан суҳбатда.
