Вазирлар Маҳкамасининг тегишли карори билан Ўзбекистон техник жиҳатдан тартибга солиш агентлигида қатор тайинловлар амалга оширилди. Бу ҳақда бош вазир матбуот котиби Бекзод Ҳидоятов хабар бермоқда.
Унга кўра, Абдурауф Абдурашидович Абдуқаюмов агентлик директорининг биринчи ўринбосари бўлди. У 1979 йилда Тошкент шаҳрида туғилган. 2002 йилда Тошкент давлат техника университетини (магистр) тамомлаган. Бунгача эса агентликнинг директорига ўринбосар эди.
Шунингдек, Одилжон Зохиджонович Тохиров агентлик директорининг ўринбосари лавозимига тайинланди. Аввал у мазкур ташкилотнинг Мувофиқликни баҳолаш ва сифат тизимларини жорий этиш бошқармаси бошлиғи бўлган.
Азамат Абдулхакимович Абдурахманов эса ташкилотда Техник жиҳатдан тартибга солиш соҳасида назорат инспекцияси бошлиғи лавозимига киришди.
Эслатиб ўтамиз, февраль ойи охирида энергетика вазири ўринбосари сифатида ишлаб келган Акмал Жуманазаров Техник жиҳатдан тартибга солиш агентлиги директори этиб тайинланганди.
Маълумот учун, агентлик халқаро ташкилотлар ва хорижий давлатлар билан миллий мувофиқликни баҳолаш, маҳаллий маҳсулотларни ишлаб чиқаришда халқаро стандартлар ва техник регламентларни жорий этиш орқали уларнинг замонавий талабларга мувофиқлигини таъминлаш ва бошқа вазифаларни бажаради.
