2 апрель куни Истанбулдаги 16 қаватли бинода содир бўлган ёнғин оқибатида 29 киши ҳалок бўлди, яна 7 киши жароҳатланди, деб хабар бермоқда Anadolu агентлиги.
Ёнғин маҳаллий вақт билан соат 13:00 атрофида Ғайраттепа туманидаги уйнинг ертўласида жойлашган тунги клубда содир бўлган. Ёнғин таъмирлаш ишлари олиб борилаётган вақтда юзага келган. Ҳозирда унинг келиб чиқиш сабаблари ўрганилмоқда.
Воқеа жойига кўп сонли ўт ўчириш, тиббиёт ва полиция гуруҳлари юборилди. Ёнғинни ўчиришда 31 та ўт ўчириш машинаси иштирок этди, дея аниқлик киритмоқда агентлик.
Истанбул губернатори Давут Гюлнинг айтишича, ҳалок бўлганлар таъмирлаш ишлари билан шуғулланаётган ишчилар бўлган.
Туркия Ички ишлар вазирлиги воқеа юзасидан суриштирув ишлари бошланганини маълум қилди.
Беш кишини ҳибсга олиш учун ордер берилган, улар орасида тунги клубни бошқарган уч киши ва таъмирлаш ишларига масъул бўлган бир киши бор, деб ёзди CNN адлия вазири Йилмаз Тунчга таяниб.
Ўзбекистоннинг Истанбулдаги бош консулхонасининг маълум қилишича, жабрланган ва ушланганлар орасида Ўзбекистон фуқаролари аниқланмаган.
