Баҳор Украинага бироз енгиллик олиб келди — энди энергетика инфратузилмасига қилинган ҳужумлар «чидаб бўлмас» даражада бўлмайди ва баҳорги лойқалик рус қўшинларини фронт чизиғида ушлаб туради, аммо бу узоқ давом этмайди, деб ёзмоқда The Economist.
Россия келаётган ёзда янги йирик ҳужумни бошлаши мумкин. «Украинанинг ушбу ҳужумни ушлаб туриш қобилияти бир йил олдингига қараганда анча ишончсиз кўринмоқда. Шунинг учун мамлакат зудлик билан кўпроқ қўшинларни сафарбар қилиши ва ишончли мудофаа чизиғини қуриши керак», — деб ҳисоблайди нашр.
Украинанинг Ғарбдаги иттифоқчилари чалғиган — улар Яқин Шарқ, бўлажак сайловлар ва ўзларининг иқтисодий муаммолари билан банд, дея қайд этди Economist. Дональд Трампни қўллаб-қувватлаётган республикачиларнинг Украинага 61 миллиард долларлик ҳарбий ёрдам пакетини блоклаш ҳақидаги қарори «фронт чизиқлари ва Украина шаҳарларида (артиллерия снарядлари ва ҳаво ҳужумидан мудофаа тизимларининг йўқлиги назарда тутилмоқда — таҳр.) ўз таъсирини ўтказмоқда».
Америка ёрдамни тақсимлаш бўйича боши берк кўчага кириб қолгани Россияга Украинанинг етарлича мустаҳкамланмаган мудофаа чизиғини ёриб ўтиш имконини беради. «Аммо, Россияни мағлуб этиш кераклигини таъкидлаётган, лекин бунга ёрдам бериш учун деярли ҳеч қандай техника юбормаётган Франция президенти Эммануэль Макрон ёки Украинани узоқ радиус учун кучли Taurus ракеталари билан таъминлашдан бош тортаётган ишончсиз Германия канцлери Олаф Шольцнинг жанговар баёнотларига қарамай, Европа ҳам Киевга кўмак бериш борасида бундан яхшироқ ҳаракат қилмаяпти». Нашрнинг қўшимча қилишича, Европа Киевга режалаштирилганидек 1 миллион артиллерия ўқини ҳам етказиб бера олмаган.
«Бироқ Украина шунчаки ўз иттифоқчиларини айблай олмайди. У ҳам хатоларга йўл қўйган», — деб ёзди Economist. Улардан бири, газетанинг ёзишича, — ҳарбий куч етишмаслиги. Россия навбатдаги сафарбарлик тўлқинига тайёргарлик кўраётган бир пайтда Украинада янгиларни ёллашга уринишлар ҳамон «демократик жараён ғалтакларига ёпишиб қолган».
Украина, шунингдек, мудофаа позицияларини «жуда кечикиб» мустаҳкамламоқда, дея қайд этади газета. «Бу қайсидир даражада тушунарли. Ҳукумат ҳали ҳам янги қарши ҳужумни орзу қилади ва ҳозирги фронт чизиғи чегарага ўхшаш нарсага айланиб, мамлакатнинг бешдан бир қисмини ажратиб ташлаши ва денгизга чиқишнинг катта қисмидан маҳрум қилишидан қўрқади. Бу чизиқ бўлажак тинчлик музокаралари учун асос бўлиши мумкинлиги ҳақидаги ғоя — айнан Зеленский қочишни хоҳлаётган нарса», — таъкидлайди нашр.
«Аммо ҳозир хавф шунчалик каттаки, бу (ҳозирги фронт чизиғини тузатиш — таҳр.) энг ёмон вариант. Сўнгги ҳафталарда экскаваторлар ҳаракатлана бошлади ва „аждаҳо тишлари“ аллақачон пайдо бўлмоқда. Буни анча олдинроқ бошлаш керак эди. Ҳали кеч эмаслигини сўраб дуо қилинг», — дея огоҳлантирди Economist.
