БМТ Хавфсизлик кенгаши 25 март куни Ғазо секторида «зудлик билан ўт очишни тўхтатиш»га чақирувчи резолюцияни қабул қилди, деб хабар берди BBC News.
Ҳужжат, шунингдек, барча гаровга олинганларни зудлик билан, шартсиз озод қилишни талаб қилади.
Бу 2023 йил октябрь ойида ҲАМАС Исроил ҳудудига ҳужум қилганидан кейин Исроил ва ҲАМАС ўртасида уруш бошланганидан бери БМТ Хавфсизлик Кенгаши томонидан маъқулланган биринчи шундай чақириқ ҳисобланади.
Бундан аввал Хавфсизлик Кенгашининг Ғазода ўт очишни тўхтатишга чақирувчи резолюцияларини блоклаган АҚШ бу сафар овоз беришда бетараф қолди, деб ёзди The Guardian.
Қабул қилинган резолюция кенгашнинг доимий бўлмаган ўн нафар аъзоси томонидан ёзилган ва Мозамбик вакили томонидан таклиф қилинган. Ҳужжат учун Хавфсизлик Кенгашининг 14 аъзоси овоз берган.
«Ушбу резолюция амалга оширилиши керак. Рад этиш кечирилмас бўларди», — деб ёзди БМТ раҳбари Антониу Гутерриш.
