Президентнинг 14 март куни имзоланган қарори билан Экспортни рағбатлантириш агентлиги ҳамда Экспортни қўллаб-қувватлаш жамғармаси негизида «Савдони ривожлантириш компанияси» акциядорлик жамияти ташкил этилди. Бу ҳақда Адлия вазирлигининг «Ҳуқуқий ахборот» Telegram каналида хабар берилди.
Компаниянинг устав капиталидаги давлат улушини бошқариш функцияси ишончнома асосида Савдо-саноат палатасига берилди.
Энди ташқи иқтисодий фаолият иштирокчиларига кўмаклашиш (экспортолди ва экспорт билан боғлиқ савдо операцияларини молиялаштириш бундан мустасно) учун давлат бюджетидан ажратиладиган маблағлар Инвестициялар, саноат ва савдо вазирлигида юридик шахс ташкил этмасдан очиладиган Савдога кўмаклашиш жамғармасига йўналтирилади. Бу жамғарма маблағларини бошқариш ҳуқуқи ҳам «Савдони ривожлантириш компанияси»га берилди.
«Ўзбекэкспертиза» АЖ устав капиталидаги давлат улуши ва айрим давлат иштирокидаги корхоналарга тегишли улушларни Давлат активларини бошқариш агентлигига ўтказган ҳолда, улардаги давлат улушини бошқариш функциясини ишончнома асосида Савдо-саноат палатасига берилди.
Савдо-саноат палатасининг вазифаларидан бири сифатида махсус иқтисодий, кичик саноат, ёшлар саноат ва тадбиркорлик зоналарига инвесторларни жалб қилиш, уларнинг иштирокчиларига кўмаклашиш белгиланди.
Савдони ривожлантириш компанияси ташкил этилиши ҳақида 12 март куни президент матбуот хизмати хабар берганди.
Хабарда ҳудудларда ишлаб чиқариш, саноат зоналари ва экспорт масалаларини яхлит тизимда бирлаштириш мақсад қилинаётгани, 12 та тармоқ ва саноат уюшмасини Савдо-саноат палатаси тизимига ўтказиш таклиф этилаётгани айтилганди. Бу орқали лойиҳа тайёрлаш ва экспорт тизими давлатдан тадбиркорлар ўзини ўзи бошқарадиган ташкилотга ўтиши, натижада уларнинг талаб ва истакларини эшитиш, муаммоларини ҳал қилиш осонлашиши, тадбиркорларнинг ўзаро ҳамкорлиги кучайиши таъкидланганди.
Шунингдек, ривожланган мамлакатлар тажрибасидан келиб чиқиб, соҳадаги агентлик ва жамғармалар ўрнига Савдони ривожлантириш компанияси ташкил этилиши қайд этилганди.
У чет элдан малакали дизайнер, технолог ва маркетологларни жалб этиб, миллий маҳсулотларни халқаро талабларга мослаштириш, экспортчиларнинг янги бозорларга чиқишига кўмаклашиш, миллий брендларни хорижда тарғиб қилиш билан шуғулланади. Бу компания томонидан субсидия, компенсация ва бошқа кўмаклар тадбиркорларнинг барқарорлик рейтинги асосида ажратилади. Шунингдек, барча туманда Тадбиркорларни қўллаб-қувватлаш лойиҳа офислари иш бошлаши кутилмоқда.
