Дунёда электромобиллар (EV) атрофидаги ажиотаж аста-секин сусаймоқда, деб ёзмоқда АҚШнинг CNBC телеканали. Йирик автомобиль ишлаб чиқарувчилари (Ford Motor, General Motors, Mercedes-Benz, Volkswagen, Jaguar Land Rover ва Aston Martin) электромобиль ишлаб чиқариш режаларини қисқартирмоқда ёки кечиктирмоқда.
CNBC`нинг таъкидлашича, ҳатто АҚШ EV бозорининг етакчиси бўлган Tesla ҳам (мамлакатдаги EV сотувининг 55 фоизини ташкил қилади) 2024 йилда ўсиш суръатлари «сезиларли даражада паст бўлиши мумкин»лигига тайёрланмоқда.
Февраль ойи охирида Apple электромобиллар ишлаб чиқариш бўйича Titan лойиҳасини қисқартираётгани ҳам маълум бўлди. Аввалроқ компания 2025 йилда ўз электромобилини тақдим этиши ҳақида хабар берилган эди.
«21 ва 22 йилларда биз кўрган нарса бозорда электромобилларга талаб ҳақиқатан ҳам ўсган вақтинчалик чайқалиш бўлди, — деди Ford электромобиллар бўлимининг бош операцион директори Марин Гьяджа CNBC`га. — Талаб ҳали ҳам ўсиб бормоқда, лекин биз ўйлагандек тез эмас».
CNBC АҚШни мисол қилиб келтирмоқда, у ерда EV`га бўлган қизиқишнинг биринчи тўлқини ва Tesla`нинг машҳурлиги ошганидан сўнг, электромобил сотиб олиш учун кредитлар бўйича фоиз ставкалари ва уларни ишлаб чиқариш учун хомашё нархи ошган. Натижада EV`лар анъанавий турларга қараганда анча қимматлашган. Телеканал, шунингдек, электромобилларини қувватлантириш учун инфратузилманинг ёмонлигига ишора қилмоқда.
CNBC маълумотларига кўра, бозор аралаш ва мувозанатли — гибридлар ва тўлиқ электр вариантлари билан бир қаторда газда юрадиган автомобиллар ҳам мавжуд таклифга қайтмоқда. «Бу ҳали ҳам бутунлай электрга боғланган келажакни кўрсатмоқда, лекин аввал кутилганидан анча секинроқ суръатда», — дейилади мақолада.
Гибрид моделлар ишлаб чиқаришни йўлга қўйиш ёки кўпайтиришни режалаштирган автомобиль ишлаб чиқарувчилари орасида АҚШнинг Ford ва GM, Германиянинг Volkswagen, Жанубий Кореянинг Hyundai Motor ва Kia, шунингдек, Япониянинг Toyota компаниялари бор.
