Интернетда Uzbekistan Airways авиакомпаниясига тегишли самолёт қаноти кулранг ёпишқоқ лента билан қоплангани акс этган видео тарқалди.
Авиакомпания изоҳида таъкидланишича, Boeing 787 Dreamliner самолётининг композит қисмларида бўёқларнинг тозаланиши муаммоси бир неча йиллардан бери кузатилмоқда.
«Ушбу муаммо Boeing 787 Dreamliner — янги авлод ҳаво кемаси авиация учун нисбатан янги материаллардан — тахминан 80 фоиз композитлардан яратилгани билан боғлиқ. Ультрабинафша нурланишни, шунингдек, парвоз пайтида ҳаво кемасининг эгилувчанлигини ҳисобга олган ҳолда, қўлланадиган бўёқ қатламлари бардош бера олмайди ва катта бўлаклар билан кўчиб кетади», — дейилади хабарда.
«Ишлаб чиқарувчи компаниянинг таҳлилига кўра, бундай бўёқ кўчиши косметик нуқсон бўлиб, парвознинг яроқлилиги ва ҳаво кемаси парвозларининг хавфсизлигига ҳеч қандай таъсир кўрсатмайди», — деб ишонтиради компания.
Uzbekistan Airways ҳам Boeing 787 каби самолётлар билан худди шундай муаммога дуч келмоқда, бунда Boeing тавсиясига кўра, вақтинчалик ечим махсус ёпиштириладиган лентадан (speed tape) фойдаланиш ҳисобланади, дея хабар беради компания.
Ҳозирда самолёт ишлаб чиқарувчиси устки қатламни бўёқ билан қоплашнинг махсус амалиётини ишлаб чиқмоқда, дастлабки маълумотларга кўра, бу яқин ойларда якунланади. Boeing билан олиб борилган музокаралар натижаларига кўра, концерн самолёт сиртини бўяш ва уларни ишлаб чиқарувчи базасига етказиш бўйича барча харажатларни ўз зиммасига олишга тайёр, дейилади хабарда.
«Юқоридагиларни инобатга олган ҳолда, Uzbekistan Airways яқин келажакда учта Boeing 787 Dreamliner самолётини босқичма-босқич қайта бўяшни режалаштирган… Таъкидлаш керакки, бу муаммо авиакомпаниянинг Boeing 787 Dreamliner самолётида парвозлар хавфсизлиги ва қулайлигига ҳеч қандай таъсир кўрсатмайди», — дейилади изоҳда.
Uzbekistan Airways`нинг таъкидлашича, «орзулар лайнери»нинг деярли барча фойдаланувчилари: All Nippon Airways, Japan Airlines, United Airlines, American Airlines, Air New Zealand ва бошқалар, иқлим шароитидан қатъи назар, худди шундай муаммога дуч келган.
«Барча авиаташувчилар ультрабинафша нурлар таъсирида ушбу турдаги ҳаво кемаларидаги бўёқ қопламасини кўчиши ҳақида мунтазам равишда хабар беришади… Boeing концерни кўчиб кетган бўёқни тиклаш учун ультрабинафша нурланишини тўсувчи қўшимча устки қатламни қўшишни режалаштирмоқда. Speed tape лентаси бўёқни кейинги бўёқ кўчишидан ҳимоя қилиш учун мўлжалланган», — дейилади компания хабарида.
Шу билан бирга, Boeing композит юзаларида бўёқ қопламаси муаммоларига дуч келаётган ягона авиация ишлаб чиқарувчиси эмас, дея қўшимча қилди Uzbekistan Airways.
