АҚШнинг БМТдаги собиқ вакили, Республикачилар партиясидан номзодлик учун курашда Дональд Трампнинг ягона рақиби Никки Ҳейли президентлик пойгасидан чиқишини расман эълон қилди, деб хабар бермоқда CNN.
«Буюк мамлакатимизнинг ҳар қисмидан бизни қўллаб-қувватлаганинглар учун бутунлай миннатдорман. Аммо энди кампаниямни тўхтатиб туриш вақти келди. Мен америкаликларнинг овози эшитилишини хоҳлашимни айтгандим. Мен буни амалга оширдим ва ҳеч нарсадан афсусланмайман», — деди у Чарлстондаги (Жанубий Каролина штати) чиқишида.
Ҳейли, шунингдек, ҳозирда Республикачилар партиясидан президентликка ягона номзод бўлиб қолаётган Трампни табриклади, лекин ўз тарафдорларини собиқ президентга овоз беришга ундамади.
«Энди Дональд Трамп нафақат партиямиздаги, балки партиядан ташқаридаги уни қўллаб-қувватламаганларнинг овозини ҳам олиши керак бўлади. Умид қиламанки, у буни эплайди», — деди Ҳейли.
Ҳейли «супер сешанба» — АҚШнинг биратўла 15 штатида демократлар ва республикачилар учун партия сайловлари бўлиб ўтган кунда сезиларли муваффақиятга эриша олмагач, президентлик пойгасидан чиқмоқда. У фақат Вермонт штатида ғалаба қозона олди.
Ҳейлининг нутқидан сўнг Дональд Трамп ҳам, АҚШнинг амалдаги президенти Жо Байден ҳам унинг тарафдорларини ўзларини қўллаб-қувватлашга чақирди.
