Қорақалпоғистоннинг Тахтакўпир туманида маст эркак 4-сонли мактабга киришга уринди, деб хабар қилди Миллий гвардия матбуот хизмати.
Ҳолат 4 март куни соат тахминан 15:40 ларда содир бўлган. Мактаб қоровули 45 ёшли эркакни мактабга киришга рухсат бермаган, шундан сўнг у жанжал кўтариб, курткаси ичидан болта чиқарган.
Чақирув олган Миллий гвардия хавфсизлик бошқармаси тезкор гуруҳи 8 дақиқа ичида воқеа жойига етиб борган.
Эркак бошланғич синфда ўқитувчи бўлиб ишлайдиган хотини билан кўришиш учун келганини, болтани эса ўтин чопиш олдидан ўткирлатишга олиб чиққанини айтган.
Миллий гвардия хабарига кўра, эркак туман тиббиёт бўлимига олиб борилган, сўнг мастлик ҳолати бўлган шахсларга тиббий ёрдам кўрсатиш пунктига ётқизилган.
Ҳодиса юзасидан туман ИИБ томонидан суриштирув ишлари олиб борилмоқда.
