Антарктида материгида парранда гриппининг юқори патогенли штамми (H5N1) билан касалланишнинг биринчи ҳолатлари қайд этилди, деб ёзди Reuters. Бу материкнинг жанубий минтақасида яшовчи юз минглаб пингвин колониялари учун потенциал хавф туғдиради.
Вирус аргентиналик олимлар томонидан ўтган ҳафта охирида «Примавера» тадқиқот базаси яқинида иккита ўлик скуада топилган.
H5N1`нинг энг йирик эпидемияси 2021 йилда бошланганди ва шундан бери миллионлаб ёввойи қушларнинг ўлимига сабаб бўлди, дея қайд этади The Guardian. Инфекция Океаниядан ташқари барча қитъаларга тарқалди.
Парранда гриппи Антарктика минтақасига 2023 йил октябрь ойида етиб келган, у қитъадан тахминан 1600 км узоқликда жойлашган суб-Антарктика оролларида аниқланган.
Аввалига олимлар вирусни чағалак, скуа ва чигиртчи каби қушларда қайд этганди, аммо вақт ўтиши билан касаллик альбатрослар, пингвинлар ва фулмарларга ҳам ўтган. Кейинчалик инфекция Антарктика сутэмизувчиларига етиб борди, бу денгиз филлари ва денгиз мушукларининг оммавий нобуд бўлишига олиб келди. Декабрь ойида H5N1`дан биринчи оқ айиқ ўлими тасдиқланди.
Тадқиқотчиларнинг қайд этишича, пингвинлар бир-бирига яқин жойлашади ва вируснинг қушлар колонияларига кириб бориши касалликнинг тез тарқалишига олиб келиши мумкин. «Мен [вирус] пингвинларга тарқалишидан қўрқаман. Скуалар бир-бирига жуда яқин яшайди, шунинг учун вирус юқиши учун жуда кўп имконият мавжуд», — деди Антонио Альками, Испания Олий илмий тадқиқотлар кенгаши эксперти.
Аввалроқ Жанубий Африка, Чили ва Аргентинада авж олган эпидемиялар пингвинларнинг вирусга сезгир эканини кўрсатганди. H5N1 Жанубий Америкада аниқланганидан бери касаллик 500 мингдан ортиқ денгиз қушларини, жумладан, пингвинлар, сақоқушлар ва ганнетларни нобуд қилди.
