АҚШ Молия вазирлигининг (OFAC) Хорижий активларни назорат қилиш бошқармаси Polarstar Logistics компаниясининг Ўзбекистондаги ваколатхонасини санкциялар рўйхатига киритди. Бу ҳақда бошқарма сайтида хабар берилди.
АҚШнинг янги санкциялари Россиянинг Украинага босқини икки йиллиги муносабати билан, шунингдек, россиялик мухолифатчи Алексей Навальнийнинг ўлимига жавобан киритилди. Чекловлар Россия ва учинчи давлатлар, жумладан, Европа, Шарқий Осиё, Марказий Осиё ва Яқин Шарқдаги 500 дан ортиқ жисмоний ва юридик шахсларга тааллуқли.
OFAC Polarstar Logistics компаниясининг Россия билан қандай алоқаси борлигига аниқлик киритмади. Компания сайтидаги маълумотлардан маълумки, у турли мураккабликдаги юкларни ташиш билан шуғулланади — автомобиллардан тортиб тез бузиладиган маҳсулотларгача. Компаниянинг Дубайда (БАА) ҳам офиси бор.
Санкцияларга Қозоғистонда рўйхатдан ўтган Da Group 22 ва Elem Group компаниялари, шунингдек, Қирғизистоннинг Ukon компанияси ҳам кирди. АҚШ Молия вазирлиги маълумотларига кўра, Ukon Россияга Америкада ишлаб чиқарилган самолёт компонентлари ва қисмларини юборган. Da Group 22 ва Elem Group электрон ва телекоммуникация ускуналари ҳамда эҳтиёт қисмлари улгуржи савдоси билан шуғулланади, деб ёзади Қозоғистон ОАВлари.
Бу Марказий Осиё компанияларининг АҚШ санкциялари рўйхатига киритилиши билан боғлиқ биринчи ҳолат эмас. Бундан аввал АҚШ Ўзбекистон, Қозоғистон, Қирғизистон ва Тожикистон корхоналарига Россия Федерациясига санкцияланган товарларни етказиб бериш бўйича чекловлар жорий қилган эди.
