Intuitive Machines компанияси томонидан ишлаб чиқилган IM-2 миссиясининг «Оддисей» (Odysseus) номли учувчисиз қўниш модули Шарқий минтақа вақти билан 22 февраль куни соат 18:23 да (Тошкент вақти билан 23 февраль куни соат 4:23 да) Ой сатҳига қўнди, дея хабар берди АҚШнинг NASA космик агентлиги.
Meduza’нинг ёзишича, «Одиссей» 15 февраль куни Ердан старт олган эди. У Флорида штатидаги Канаверал бурнидаги космодромдан SpaceX Falcon 9 ракетаси ёрдамида учирилган. Ойга етиб бориши учун космик қурилмага саккиз кун вақт керак бўлди.
«Одиссей» қўнганидан кўп ўтмай парвозни бошқариш маркази Ой сатҳидан сигналларни қабул қила бошлади. Шундан сўнг носозликлар юз бериб, орадан икки соат ўтгачгина Intuitive Machines космик кема «вертикал ҳолатга келгани ва маълумотларни узата бошлагани»ни маълум қилди.
«Одиссей» Американинг ярим асрдан бери Ойга қўнган илк космик қурилмаси бўлди — сўнгги бор 1972 йили, астронавтларни Ойга олиб чиққан «Аполлон-17» миссияси доирасида АҚШ космик кемаси Ойга қўнган эди.
NASA раҳбари Билл Нельсон «Одиссей» миссиясини «инсоният учун муваффақият» деб атади. «Бугун ярим асрда деганда илк бор Америка Ойга қайтди», — деди Нельсон, ушбу воқеа билан Intuitive Machines ва NASA жамоасини қутларкан.
CNN’нинг қайд этишича, Америка космик агентлиги «Артемида» дастури доирасида Ойга астронавтларга учиришдан аввал Ер табиий йўлдошини хусусий пудратчилар томонидан ишлаб чиқилган роботлар ёрдамида тадқиқ этишга интилмоқда.
Маълумот учун, 2023 йил августида Ҳиндистон Ойнинг Жанубий қутби ҳудудига «Чандраян-3» автоматик ой станциясини қўндирган эди. Ҳиндистон шу тариқа АҚШ, Хитой ва СССРдан сўнг Ойга ўз космик аппаратини қўндира олган жаҳондаги тўртинчи мамлакатга айланган эди.
Ҳинд аппарати билан деярли бир вақтда Россиянинг «Луна-25» станцияси ҳам Ойгача етиб борган, аммо у Ер табиий йўлдоши юзасига қулаб, ишдан чиққан эди.
