Уйчи тумани орқали Учқўрғон ва Норин туманларини вилоят маркази билан боғловчи янги йўл ва Норин дарёси устига кўприк қурилмоқда. Бу ҳақда Наманган вилояти ҳокимлиги ахборот хизмати хабар берди.
Қайд этилишича, мазкур лойиҳанинг умумий узунлиги 17,5 километрни ташкил этади.
Республика йўл қурилиш дирекцияси буюртмачилигида бош пудратчи «Тошкент кўприклардан фойдаланиш» ДУК томонидан Норин дарёси устига 2024 йилда қиймати 53,6 млрд сўмлик 482 метр узунликдаги кўприк қурилади. Жами объект қиймати 184,9 млрд сўмни ташкил этади, дейилади ҳокимлик хабарида.
Ушбу лойиҳа орқали Уйчи, Норин туманларида транспорт тирбандликлари ва келгусида юзага келиши мумкин бўлган йўл-транспорт ҳодисалари олди олиниши, 100 дан зиёд МФЙда яшовчи 450 минг аҳоли ва 100 дан ортиқ тадбиркорлик субъектига қулайлик яратилиши қўшимча қилинди.
Норин дарёси кўприги
2020 йилда Фарғона ҳалқа йўлининг 93-километрида жойлашган ҳамда икки туманни вилоят маркази билан боғлаб турувчи «Нориндарё» кўпригида дарз кетиш аломатлари аниқлангач, вақтинча ёпилган. Мазкур кўприк 1962 йилда фойдаланишга топширилган. Бундан бир неча йил олдин минглаб фуқаролар ишга, ўқишга, бозорга ҳамда ўзларининг бошқа эҳтиёжлари йўлида дарёни қайиқ орқали кесиб ўтишга мажбур бўлаётганди.
Дарё ёпиқ бўлган пайтда эса Норин туманида дарёни кесиб ўтиш учун вақтинчалик кўприк қурилган.
Орадан 6 ой ўтгач, қурилиш ишлари якунланиб, 1 ноябрь куни янги кўприк фойдаланишга топширилган.
