Тошкент халқаро аэропортида мавжуд терминални кенгайтириш бўйича олиб борилаётган қурилиш ишлари муносабати билан айрим чекловлар жорий этилди, деб хабар қилди Uzbekistan Airports матбуот хизмати.
Автотранспорт воситалари, жумладан, таксилар ва сайёҳлик автобуслари кириши учун халқаро терминал автотураргоҳи ёнида йўловчиларни тушириш/олиш учун алоҳида йўлак ажратилган. Ушбу йўлакдан фойдаланиш бепул ва йўловчиларни тушириш/олиш муддати 10 дақиқадан ошмаслиги лозим. Узоқроқ вақтга тўхташ керак бўлса, автотураргоҳдан фойдаланиш керак.
Шунингдек, терминалда реконструкция ишлари муносабати билан Тошкент халқаро аэропортининг жўнаб кетиш залига кузатувчиларнинг кириши вақтинча чекланган. Истисно тариқасида, ҳомиладор ва болали аёллар, қариялар ва ногиронларга ҳамроҳлик қилувчи шахсларга жўнаб кетиш залига киришга рухсат этилади. Кузатувчилар ўзлари билан шахсни тасдиқловчи ҳужжат олиб келишлари керак.
Uzbekistan Airports раҳбарияти ва пойтахт аэропорти маъмурияти вақтинчалик ноқулайликлар учун узр сўради.
Uzbekistan Airports декабрь ойида кенг кўламли реконструкция ишлари бошланганини эълон қилганди.
Лойиҳага кўра, халқаро авиақатновлар терминали майдони икки баробарга кўпаяди, жўнаб кетиш ҳудудига кириш йўллари ўзгаради, учиб келиш ва учиб кетиш заллари ягона мажмуага бирлаштирилади, терминалнинг иккинчи қаватида очиқ терраса пайдо бўлади.
Аэропорт майдонининг кенгайишига учиб келиш ва учиб кетиш биноларининг фасадларини реконструкция қилиш, шунингдек, уларни бирлаштириш орқали эришилади. Аэропортга транспортда кириш тизими ҳам ўзгаради: транспорт воситалари биринчи қават ёнига келишади, йўл ўтказгич (эстакада) эса бинонинг бир қисмига айланади.
Учиб келиш залида 48 йўловчи учун ўтиш йўлагига эга янги чегара назорати ҳудуди пайдо бўлади. Мавжуд учиб келиш зали ҳам тўрттадан саккизта юк ленталарини жойлаштиришни назарда тутган ҳолда реконструкция қилинади, бу эса кўпроқ парвозларга хизмат кўрсатиш имконини беради. Таъкидланишича, ушбу лойиҳа кутиб олувчилар учун алоҳида, ҳозирги учиб келиш залидан каттароқ — 6,2 минг кв.метр бўлган ҳудудни ўз ичига олади.
Лойиҳага кўра, учиб кетиш залида 50 та рўйхатдан ўтиш нуқтаси, катта ўлчамдаги багажларни топшириш пештахтаси, багажларни ўзи топшириш жойи, шунингдек, божхона ва юк назоратидан иборат янги йўловчиларни рўйхатга олиш зали қурилади. Авиация хавфсизлиги текширув ҳудуди ҳам кенгаяди.
Ҳаво кемаларига чиқиш учун кутиш майдонида — 800 ўринли кутиш жойи ва овқатланиш ҳудуди қуриб битказилади. Шунингдек, учиш майдонининг иккинчи қаватида шаҳарга қараган деярли 5 минг квадрат метр майдонга эга очиқ терраса пайдо бўлади.
Учиш терминали бўйлаб янги ўтиш галереяси қурилади, бу телетрап бўйлаб ўтувчи, келган ва кетаётган йўловчилар оқимини ажратиш имконини беради. Учиб келган йўловчиларга кўчага чиқмасдан терминал биносига кириш имкониятларини ошириш учун иккита қўшимча телетрап сотиб олинади. Реконструкциядан сўнг пойтахт аэропортида 6 та телетрап ишлайди, чиқиш дарвозалари сони эса 12 тани ташкил этади.
Шунингдек, багажга хизмат кўрсатиш тизимини модернизация қилиш ҳам режалаштирилган. Янги тизимнинг ўрнатилиши билан аэропорт реал вақт режимида ҳар бир йўловчининг аэропорт мажмуаси ичидаги юклари ҳаракатини кузатиш имконига эга бўлади. Бу эса юклар йўқолишини минималлаштириш ва уларни самолётга янада тезроқ юклаш имконини беради.
Юкларни саралаш учун янги майдон ва хизмат кўрсатиш ускунасининг ўрнатилиши айрим рейслар йўловчиларига парвоздан рўйхатдан ўтиш ва багажни топширишни 24 соат олдин амалга ошириш имконини беради.
